ప‌నితీరు లేక తాను కూడా ఉద్యోగం కోల్పోయాన‌న్న ఫ్లిప్‌కార్ట్ చైర్మ‌న్ ఉద్యోగాల్లోంచి తొల‌గింపు సాధార‌ణ‌మే అన్న విధంగా వ్యాఖ్య‌లు చేశారు. ఈ వ్యాఖ్యల ద్వారా మెరుగైన నైపుణ్యాన్ని ప్రదర్శించని ఉద్యోగులపై వేటు తప్పదని భారతదేశ అతిపెద్ద ఇ కామర్స్ సంస్థ సంకేతాల‌ను పంపుతోంది.సంస్థ ప్రధాన కార్యాలయం బెంగళూరులో నిర్వహించిన టౌన్‌హాల్ సమావేశంలో శుక్రవారం ప్రసంగించిన ఆయన ప‌నితీరు బాగా లేద‌న్న‌ కారణంతో తనను సీఈవో పదవినుంచి తొలగించారంటూ ఉద్యోగులకు అంతర్లీనంగా ఒక హెచ్చరికను జారీ చేశారు. గత జనవరిలో సీఈవో ఉన్న సచిన్ స్థానంలో చీఫ్ ఆపరేటింగ్ ఆఫీసర్ బిన్నీ బన్సాల్ ను కంపెనీ ప్రమోట్ చేసింది. సచిన్ బన్సాల్, బిన్నీ బన్సాల్ ఇద్దరు అమెజాన్ మాజీ ఉద్యోగులే.
సంస్థ విజయంలో ప్రధాన పాత్ర పోషిస్తున్న టౌన్‌హాల్ సమావేశం ఉద్యోగులెవరైనా ఏ సమస్యపైనైనా ప్రశ్నించే హక్కు కల్పిస్తుందని ఫ్లిప్ కార్ట్ ప్రతినిధి ఒకరు తెలిపారు. ప్రస్తుత నిబంధనలు, లీడర్ షిప్ బాధ్యతలు, వ్యాపారం తదితర వ్యవహారాలపై బహిరంగ చర్చ జరుగుతుందని పేర్కొన్నారు.