సింగపూర్‌ టెలీకమ్యూనికేషన్స్‌ లిమిటెడ్‌ (సింగ్‌టెల్‌) దేశీయ టెలికామ్‌ దిగ్గజం భారతి ఎయిర్‌టెల్‌లో వాటాలను కొనుగోలు చేయనుంది. టెమాసెక్(7.39 శాతం) వాటా కొర‌కు 659.5 మిలియ‌న్ డాల‌ర్ల‌ను వెచ్చించ‌నున్న‌ట్లు తెలుస్తోంది. ఈ చ‌ర్య‌లు భార‌త టెలికాం రంగంపై విదేశీ పెట్టుబ‌డిదారుల విశ్వాసాన్ని పెంచేందుకు దోహ‌ద‌ప‌డ‌తాయ‌ని ప‌లువురు అంటున్నారు.
భారత్‌లోనే అతిపెద్ద టెలికాం కంపెనీ అయిన భారతీ ఎయిర్‌టెల్‌కు భారతీ టెలికాం హోల్డింగ్‌ కంపెనీగా ఉంది. ఈ సంస్థలో తాజా వాటా కొనుగోలు కోసం సింగ్‌టెల్‌ 659.5 మిలియన్‌ డాలర్లు (దాదాపు రూ.4400 కోట్లు) వెచ్చించనుంది. భారతీ టెలికాంలో టెమాసెక్‌కు ఉన్న 7.39 శాతం వాటాను సింగ్‌టెల్‌ సొంతం చేసుకోనుంది. ప్రతీ భారతీ టెలికాం షేరుకు రూ.235.62 చొప్పున చెల్లించనుంది. నూత‌న చ‌ర్య వ‌ల్ల భార‌తి టెలికాం హోల్డింగ్‌లో సింగ్‌టెల్ వాటా ఇంత‌కు ముందున్న 39 నుంచి 46.39 శాతానికి పెర‌గనుంది. మిట్ట‌ల్ కుటుంబానికి ఎయిర్‌టెల్ సంస్థ‌లో మెజారిటీ (51% ) వాటా ఉంది.

రెండో పెద్ద వాటాదారుగా సింగ్‌టెల్‌

భార‌తీ ఎయిర్‌టెల్ సంస్థ‌లో భార‌తీ టెలికాంకు 45.09 శాతం వాటా ఉంది. ఇప్ప‌టి వ‌ర‌కూ మిట్ట‌ల్ కుటుంబానికి 51%, సింగ్‌టెల్‌కు 39%, టెమాసెక్ సంస్థ‌కు 7.39% వాటాలున్నాయి. ఇప్పుడు టెమాసెక్ వాటా సైతం సింగ్‌టెల్ చేతిలోకి వెళుతుంది.