మద్యం వ్యాపారి విజయ్ మాల్యాపై సీబీఐ మరో కొత్త కేసు నమోదు చేసింది. స్టేట్ బ్యాంక్ ఆఫ్ ఇండియా రుణ ఎగ‌వేతకు సంబంధించి ఇండియన్ పీనల్ కోడ్ (ఐపీసీ) సెక్షన్ 420 ప్రకారం సెంట్రల్ బ్యూరో ఆఫ్ ఇన్వెస్టిగేషన్ (సీబీఐ) శనివారం చీటింగ్ కేసు నమోదు చేసింది. ఈ సెక్షన్ కింద గ‌రిష్టంగా ఏడేళ్ల జైలు శిక్ష,జరిమానా ప‌డే అవకాశం ఉంది.

కింగ్‌ఫిష‌ర్ ఎయిర్‌లైన్స్ మాజీ అధినేత మాల్యా దేశంలో స్టేట్ బ్యాంక్ స‌హా 17 బ్యాంకుల రుణాల‌ను ఎగ‌వేసి బ్రిట‌న్‌కు పారిపోయిన సంగ‌తి తెలిసిందే. దీంతో వ‌డ్డీతో స‌హా 9 వేల కోట్ల రూపాయ‌ల‌ను చెల్లించాల్సిందిగా కోరుతూ బ్యాంకుల క‌న్సార్టియం సుప్రీంకోర్టును ఆశ్ర‌యించింది. ఇదే కాకుండా వివిధ ర‌కాల నేరాల‌కు గాను ఈడీ(ఎన్‌ఫోర్స్‌మెంట్ డైరెక్ట‌రేట్‌) ఎస్ఎఫ్ఐవో(సీరియ‌స్ ఫ్రాడ్ ఇన్వెస్టిగేష‌న్ ఆఫీస్‌) స‌హా వివిధ సంస్థ‌లు మాల్యాపై ద‌ర్యాప్తు చేస్తున్న సంగ‌తి తెలిసిందే.