స్థిరాస్తి పెట్టుబ‌డులు

స్థిరాస్తిలో పెట్టే పెట్టుబ‌డులు సాధార‌ణంగా దీర్ఘ‌కాలంలో మంచి రాబడుల‌ను ఇస్తాయి. ఇల్లు, స్థ‌లం కొనుగోలు చేయ‌డం మూలంగా భ‌విష్య‌త్తులో ఎక్కువ ధ‌ర‌కూ అమ్మినా ఆదాయం వ‌స్తుంది. లేదా లీజు, అద్దె రూపంలో క్ర‌మ ఆదాయాన్ని రాబ‌ట్టుకోవ‌చ్చు. ఒక‌వేళ గృహ రుణం తీసుకుని ఇల్లు క‌ట్టుకునే ఆలోచ‌న ఉంటే, గృహ రుణం దాని వ‌డ్డీల‌ను చూప‌డం ద్వారా ఆదాయ‌పు ప‌న్ను నుంచి త‌ప్పించుకోవ‌చ్చు.

ఈక్విటీ పెట్టుబ‌డులు

ఈక్విటీ పెట్టుబ‌డులు అన‌గానే ఎక్కువ మంది రిస్క్ అని భావిస్తారు. దీర్ఘ‌కాలంలో మంచి రాబ‌డుల‌ను ఆశిస్తూ ఉన్న‌ట్ల‌యితే ఈక్విటీ పెట్టుబ‌డుల‌ను మంచి పెట్టుబ‌డి మార్గంగా ఎంచుకోవ‌చ్చు. స్టాక్ మార్కెట్ దీర్ఘ‌కాలంలో మంచి రాబ‌డుల‌ను ఇస్తూనే ఉండేందుకు అవ‌కాశాలు ఎక్కువ‌. రిస్క్‌ను త‌గ్గించుకోవాల‌నుకుంటే బ్లూచిప్ స్టాక్స్‌ను కొనుగోలు చేయ‌వ‌చ్చు లేదా రిస్క్ త‌క్కువ ఉండే రంగాన్ని ఎంపిక చేసుకోవాలి.

మ్యూచువ‌ల్ ఫండ్ పెట్టుబ‌డులు

న‌ష్ట‌భ‌యం, రాబ‌డుల‌ను దృష్టిలో పెట్టుకుని ర‌క‌రకాల మ్యూచువ‌ల్ ఫండ్ల‌లోంచి మ‌న‌కు స‌రిపోయే వాటిని ఎంచుకోవ‌చ్చు. మ్యూచువ‌ల్ ఫండ్ల‌లో పెట్టుబ‌డులు పెట్టేందుకు ఉత్త‌మ మార్గం సిప్‌(సిస్ట‌మాటిక్ ఇన్వెస్ట్‌మెంట్ ప్లాన్‌). ప్ర‌తి నెలా చిన్న మొత్తాల్లో పెట్టుబ‌డులు పెడుతూ దీర్ఘ‌కాలంలో పెద్ద‌మొత్తాల్లో పొదుపు చేసుకోవ‌చ్చు. దీర్ఘ‌కాలంలో మ్యూచువ‌ల్ ఫండ్స్ మంచి రాబడుల‌నే అందిస్తున్నట్లుగా ఆర్థిక ప్ర‌ణాళిక నిపుణులు చెపుతూ ఉంటారు.

బాండ్ల‌లో పెట్టుబ‌డులు

వేత‌న జీవులు దీర్ఘ‌కాల పెట్టుబ‌డి పెట్టాలంటే మ‌రో మార్గం బాండ్లు. అధిక ప‌న్ను ప‌రిధిలో ఉండేవారు మంచి రాబ‌డులు పొందాలంటే బ్యాంకు డిపాజిట్ల కంటే బాండ్లు మంచి మార్గం.

ప‌బ్లిక్ ప్రావిడెంట్ ఫండ్‌

భార‌త్‌లో బాగా ఆద‌ర‌ణ పొందుతున్న దీర్ఘ‌కాల పెట్టుబ‌డి మార్గాల్లో ప‌బ్లిక్ ప్రావిడెంట్ ఫండ్ మ‌రొక‌టి. ఇక్క‌డ పెట్టుబ‌డి ద్వారా వ‌చ్చే రాబ‌డులకు ప‌న్ను ఉండ‌దు కాబ‌ట్టి ఉద్యోగుల‌కు మంచి ప్ర‌యోజ‌న‌క‌రంగా ఉంటాయి.

బంగారంలో పెట్టుబ‌డులు

అప్పుడప్పుడు బంగారం ధ‌ర‌లు త‌గ్గుతూ, పెరుగుతూ ఉండొచ్చు. అయితే పెట్టుబ‌డుల వైవిధ్యీక‌ర‌ణ కోసం బంగారం మ‌రో ఉత్త‌మ మార్గం. కొంచెం పెట్టుబ‌డిని బంగారంలో ఉంచ‌డం త‌ప్పేమీ కాదు. అయితే బంగారంలో పెట్టుబ‌డి పెట్టేందుకు భౌతిక రూపంలోనే ఉంచుకోన‌క్క‌ర్లేదు. గోల్డ్ ఈటీఫ్‌లు, బంగారు కాయిన్లు, బంగారు బిస్కెట్లు, బంగారు బాండ్ల‌ను ఆశ్ర‌యించ‌వ‌చ్చు.

ఐపీవోల్లో పెట్టుబ‌డులు

గ‌తేడాది కాలంగా ఐపీవోల్లో పెట్టుబ‌డిన పెట్టుబ‌డులు మంచిగా రాణిస్తున్నాయి. స‌రైన రాబ‌డులు రావాలంటే మంచి కంపెనీల్లో పెట్టుబ‌డులు పెట్టేలా చూసుకోవాలి.

యులిప్స్

బీమా, పెట్టుబ‌డి క‌ల‌గ‌లిపి ఉన్నందున ఇదివ‌ర‌కే సాధార‌ణ జీవిత బీమా ఉన్న వారు సైతం యునిట్ లింక్‌డ్ ఇన్సూరెన్స్ ప్లాన్స్‌(యులిప్‌) వైపు చూడ‌టం కూడా మంచిదే. ఈక్విటీలు, డెట్‌ల్లో యులిప్‌లు పెట్టుబ‌డులు పెడుతూ ఉంటాయి క‌నుక మార్కెట్ ఆధారంగా పెట్టుబడుల‌ను స‌వ‌రిస్తూ ఉంటారు. దీంతో దీర్ఘ‌కాలంలో మంచి రాబడుల‌కే అవ‌కాశం ఉంటుంది. అయితే స్వ‌ల్ప కాలం పెట్టుబ‌డులు పెట్టాల‌నుకునేవారికి యులిప్స్ సూచ‌నీయం కాదు.

ముగింపు

ఈ ఆర్థిక సాధ‌నాల‌న్నీ ముందు సంవ‌త్స‌రాల్లో మంచి రాబ‌డుల‌నే ఇచ్చిన‌ప్ప‌టికీ భ‌విష్య‌త్తులో ఎలా ఉంటాయ‌నేది మార్కెట్లు ఎలా స్పందిస్తాయ‌నే దానిపైన ఆధార‌ప‌డి ఉంటుంది. ఒక ర‌క‌మైన పెట్టుబ‌డిలో ఒడిదుడుకులు ఉన్న‌ప్ప‌టికీ పోర్ట్‌ఫోలియో స‌మ‌తుల్యంగా ఉండేలా చూసుకోవాలి.