బెంగుళూరు: భారత ఐటీ రంగంలో అత్యధిక పారితోషకం అందుకుంటున్న సీఈఓల జాబితాలో ఇన్ఫోసిస్ సీఈఓ విశాల్ సిక్కా చేరారు. ఏడాదికి 11 మిలియన్ డాలర్ల జీతాన్ని అంటే సుమారు రూ. 75 కోట్ల జీతాన్ని విశాల్ సిక్కా అందుకున్నారు. ఇటీవల కాలంలో ఆర్ధిక ఫలితాల్లో ఇన్ఫోసిస్ మంచి ఫలితాలను ప్రకటిస్తుంది.

ఈ క్రమంలో తొలుత సుమారు రూ. 54 కోట్లు ( 7.8 మిలియన్ డాలర్లు) ఉండే విశాల్ సిక్కా పారితోషికం అమాంతం పెరిగిపోయింది. సిక్కాకు ఏడాదికి 11 మిలియన్ డాలర్లు ప్యాకేజి ఉండగా, అందులో మిలియన్ డాలర్లను బేసిక్ శాలరీగా నిర్ణయించారు.

మరో 3 మిలియన్ డాలర్లను వేరియబుల్ పే, 2 మిలియన్ డాలర్ల స్టాక్ ఆప్షన్లు, మరో 5 మిలియన్ డాలర్లు స్టాక్ ఆప్షన్స్ కలిపి మొత్తం 11 మిలియన్ డాలర్ల వేతనాన్ని సిక్కా ప్రస్తుతం పొందుతున్నారు. దీంతో భారత ఐటీ దిగ్గజాల్లోని అత్యధిక వేతనం పొందుతున్న కాగ్నిజెంట్ సీఈఓ ఫ్రాన్సిస్కో డిసౌజా 2014-15 సంవత్సరానికి గాను (11.3 మిలియన్ డాలర్లు)కు దగ్గరకు చేరుకున్నారు.

కాగా 2013-14 సంవత్సరంలో టీసీఎస్ సీఈఓ ఎన్ చంద్రశేఖరన్ ప్యాకేజి 3.15 మిలియన్ డాలర్లు, అదే సంవత్సరం షేర్లు మినహా మాజీ విప్రో చీఫ్ టి.కె. కురియన్ ప్యాకేజీ 1.5 మిలియన్ డాలర్లు ఉన్నట్లు తాజా లెక్కల ప్రకారం తెలుస్తోంది.