ముంబై: ఇన్ఫోసిస్ సహ వ్యవస్థాపకుడు ఎన్ఆర్ నారాయణ మూర్తి జీవిత సాఫల్య పురస్కారం అందుకున్నారు. ఎక్సలెన్స్ ఇన్ కార్పొరేట్ గవర్నెన్స్‌కు సంబంధించి ముంబైలో గురువారం ఇన్‌స్టిట్యూట్ ఆఫ్ కంపెనీ సెక్రటరీస్ ఆఫ్ ఇండియా (ఐసీఎస్‌ఐ) 15వ జాతీయ అవార్డుల కార్యక్రమం జరిగింది.

ఈ కార్యక్రమంలో నేషనల్ స్కిల్ డెవలప్‌మెంట్ కార్పొరేషన్ చైర్మన్ ఎస్. రామదొరై చేతుల మీదుగా ఇన్ఫోసిస్ సహ వ్యవస్థాపకుడు ఎన్.ఆర్. నారాయణ మూర్తి ‘లైఫ్‌టైం అచీవ్‌మెంట్' అవార్డును అందుకున్నారు. ఈ సందర్భంగా నారాయణ మూర్తి మాట్లాడుతూ సుపరిపాలన, సామాజిక, ఆర్ధిక అభివృద్ధి కొనసాగించడంతో పాటు ప్రజలను సంక్షేమం వైపు ప్రోత్సహించడానికి గుడ్ గవర్నెన్స్ ఒక విధానమన్నారు.

ఈ మధ్య కాలంలో అభివృద్ధి చెందిన దేశాలు సామాజిక, ఆర్ధిక అంశాలపై ఎంతగానో దృష్టి సారించాయన్నారు. కొత్త ఇండియాను తయారు చేసేందుకు గాను గుడ్ గవర్నెన్స్ సాధించే దిశగా యంగ్ ప్రొపెషనల్స్‌కు సూచన చేయడం చాలా సంతోషంగా ఉందన్నారు.

ప్రస్తుతం నారాయణ మూర్తి ఇన్ఫోసిస్ ఎగ్జిక్యూటివ్ ఛైర్మన్‌గా కొనసాగుతున్నారు. కె.వి కామత్ ఆ పదవి నుంచి తప్పుకోవడంతో ఆ స్ధానంలో 2013లో నారాయణ మూర్తిని ఎగ్జిక్యూటివ్ బోర్డులోని సభ్యులు ఎంపిక చేశారు. 1981లో ఇన్ఫోసిస్‌ను ప్రారంభించిన నారాయణమూర్తి 2002 వరకు సీఈఓగా పనిచేశారు.