బెంగుళూరు: దేశీయ ఐటీ దిగ్గజం ఇన్ఫోసిస్ స్టార్టప్ కంనీల్లో పెట్టుబడులు పెడుతూ దూసుకుపోతుంది. తాజాగా అమెరికాకు చెందిన వేరియబుల్ పరికరాల అంకుర సంస్ధ వూప్‌లో 3 మిలియన్‌ డాలర్లు (సుమారు రూ.20 కోట్లు) పెట్టుబడి పెట్టినట్లు ఇన్ఫోసిస్‌ తెలిపింది.

మన కరెన్సీలో ఈ పెట్టుబడుల విలువ రూ. 20 కోట్లకు పైమాటే. వూప్‌ విషయానికి వస్తే, తొడిగే గ్యాడ్జెట్లను విక్రయిస్తుంది. అమెరికాలో ఈ సంస్థ పనితీరు చాలా మెరుగ్గా ఉండటం, గ్లోబల్ మార్కెట్‌లో ప్రీమియం స్పోర్ట్స్ పరికరాలకు డిమాండ్ పెరుగుతున్న నేపథ్యంలో ఈ పెట్టుబడులు పెట్టినట్లు ఇన్ఫోసిస్ ఒక ప్రకటనలో పేర్కొంది.

ఈ ఏడాది అక్టోబర్‌లో అమెరికా కేంద్రస్థానంగా ఆయిల్ అండ్ గ్యాస్ కన్సల్టెన్సీ సర్వీసులు అందిస్తున్న నోహా కన్సల్టింగ్‌ను ఇన్ఫోసిస్‌ కొనుగోలు చేసిన సంగతి తెలిసిందే. ఈ ఒప్పందం విలువ 7 కోట్ల డాలర్లు. మన కరెన్సీలో రూ.453.5 కోట్లు.

పూర్తిగా నగదు రూపంలో జరగనున్న ఈ కొనుగోలు ఒప్పందం.. ప్రస్తుత త్రైమాసికం ముగిసేనాటికి పూర్తికాగలదని సంస్థ బీఎస్‌ఈకి సమాచారం అందించింది. ఆయిల్ అండ్ గ్యాస్ రంగంలో ఉన్న అవకాశాలను అందిపుచ్చుకోవాలనే ఉద్దేశంతో నోహాను టేకోవర్ చేసినట్లు ఇన్ఫోసిస్ ఈవీపీ, గ్లోబల్ హెడ్ రాజేష్ మూర్తి ఈ సందర్భంగా తెలిపారు.