న్యూఢిల్లీ: బాలల దినోత్సవం సందర్భంగా పిల్లలకు ఎయిరిండియా ఓ బంఫర్ ఆఫర్ ప్రకటించింది. నవంబర్ 14వ తేదీన ఎయిర్ ఇండియా విమానాల్లో ప్రయాణించే పిల్లలకు ఆ తర్వాత ఓ లక్కీ డ్రా నిర్వహించి అందులోని విజేతలకు ఉచితంగా విమాన టికెట్లను ఇవ్వనున్నారు.

ఈ లక్కీ డ్రాలో మొదటి బహుమతి సాధించిన పిల్లలకు ఢిల్లీ- శాన్‌ఫ్రాన్సిస్కో- ఢిల్లీ మార్గంలో వెళ్లేందుకు నాలుగు ఎకానమీ టికెట్లు ఇస్తారు. రెండో బహుమతి సాధించిన పిల్లలకు నాలుగు డొమెస్టిక్ రిటర్న్ టికెట్లను ఇస్తారు.

కాగా, మూడో బహుమతి సాధించిన పిల్లలకు ఒక డొమెస్టిక్ సెక్టార్ టికెట్‌పై నాలుగు అప్‌గ్రేడ్ ఓచర్లను ఇవ్వనున్నట్లు ఎయిర్ ఇండియా ఒక ప్రకటనలో పేర్కొంది. అయితే ఈ ఆఫర్ 12 ఏళ్ల లోపు వయసున్న వాళ్లకు మాత్రమే.

డిసెంబర్ మొదటి వారంలో ఈ డ్రా తీస్తారు. పిల్లలు తమ ప్రయాణ వివరాలను ఎయిరిండియా కార్యాలయానికి నవంబర్ 30వ తేదీలోగా పంపాల్సి ఉంటుంది. దీంతోపాటు నవంబర్ 14న ఎయిరిండియా విమానాల్లో ప్రయాణం చేసే పిల్లలకు ప్రత్యేకంగా స్వీట్లు, బొమ్మలు కూడా ఇవ్వనున్నారు.