న్యూఢిల్లీ: రాబోయే రోజుల్లో పండుగ సీజన్‌ను దృష్టిలో పెట్టుకుని అంతర్జాతీయ ప్రయాణికులను ఆకట్టుకోవడానికి ప్రైవేట్ విమానయాన సంస్థ జెట్‌ఎయిర్‌వేస్ బిజినెస్, ఎకానమీ క్లాస్ టికెట్ ధరలను 30 శాతం వరకు తగ్గిస్తున్నట్లు ప్రకటించింది.

అక్టోబర్ 10వ తేదీ వరకు అమలులో ఉండనున్న ఈ ప్రత్యేక ఆఫర్ అమెరికా, యూరప్ దేశాలతోపాటు గల్ఫ్, ఐరోపా, కెనడా, సార్క్ దేశాలకు వెళ్లేవారికి కూడా వర్తించనున్నదని కంపెనీ ఒక ప్రకటనలో వెల్లడించింది.

ఇతర విమానయాన సంస్థలతో పోలిస్తే అంతర్జాతీయ మార్గాల్లో తక్కువ ధరకే టికెట్‌ను విక్రయిస్తున్నప్పటికీ, వచ్చే పండుగ సీజన్‌లో భారత్ నుంచి ఇతర దేశాలకు వెళ్లేవారికి మరింత ప్రయోజనం కల్పించాలనే ఉద్దేశంతో ఈ ఆఫర్‌ను ప్రకటించినట్లు జెట్ ఎయిర్‌వేస్ సీనియర్ వైస్ ప్రెసిడెంట్ గౌరంగ్ శెట్టి తెలిపారు.

ఈ ఆఫర్ ఎతిహాద్ ఎయిర్‌వేస్ విమానాలకు కూడా వర్తించనుందని తెలిపారు. ప్రస్తుతం 73 అంతర్జాతీయ, దేశీయ గమ్యస్థానాలకు జెట్ ఎయిర్‌వేస్ విమాన సర్వీసులను నడుపుతోంది.