ముంబై: కింగ్ ఫిషర్ ఎయిర్ లైన్స్ బకాయిలపై ప్రభుత్వ రంగ బ్యాంకు యునైటెడ్‌ బ్యాంక్‌ ఆఫ్‌ ఇండియా(యుబీఐ) ఆశలు వదులుకున్నట్లే కనిపిస్తోంది. కింగ్ ఫిషర్ చెల్లించాల్సిన బకాయిలపై యుబీఐ బ్యాంక్ ఎండీ, సీఈఓ పీ.శ్రీనివాస్ మాట్లాడుతూ ‘‘ కింగ్‌ఫిషర్ ఎకౌంట్‌పై ఎలాంటి నగదు వచ్చేలా లేదు. ముంబైలోని కింగ్‌ఫిషర్ హౌస్‌ను అమ్మితే కొద్ది మొత్తంలో డబ్బు వచ్చేలా ఉంది'' అని చెప్పారు.

‘‘మేమిచ్చిన మొత్తం 400 కోట్ల రూపాయల అప్పుపై చివరకు మహా అయితే వడ్డీ మాత్రమే దక్కేట్టుంది. అసలుపై ఆశలు వదులుకోవాల్సిందే'' అని అన్నారు. విజయ్ మాల్యాకు చెందిన కింగ్ ఫిషర్ ఎయిర్ లైన్స్‌కు స్టేట్ బ్యాంక్ ఆఫ్ ఇండియా (ఎస్‌బీఐ) కన్సార్షియంలోని మొత్తం 17 బ్యాంకులు రూ. 7,500 కోట్లు రుణాలుగా ఇచ్చాయి.

ఇందులో పంజాబ్ నేషనల్ బ్యాంకు, ఐడీబీఐ బ్యాంకు సంయుక్తంగా రూ. 800 కోట్లు, బ్యాంక్ ఆఫ్ ఇండియా రూ. 650 కోట్లు, బ్యాంక్ ఆఫ్ బరోడా రూ. 550 కోట్లు, సెంట్రల్ బ్యాంక్ ఆఫ్ ఇండియా రూ. 410 కోట్లు రుణంగా ఇచ్చాయి. రుణం తీసుకున్న కింగ్ ఫిషర్ ఎయిర్ లైన్స్ మాత్రం రూ. 1,000 కోట్లు మాత్రమే తిరిగి చెల్లించింది.

అప్పుల భారంతో 2012లో కింగ్ ఫిషర్ ఎయిర్ లైన్స్ కంపెనీ మూత పడటంతో మగిలిన రూ. 6,500 కోట్లు, వడ్డీ వసూలు చేసుకోలేక బ్యాంకులు నానా అవస్ధలు పడుతున్నాయి. బ్యాంకుల నుంచి రుణం తీసుకునేటప్పుడు హామీగా పెట్టిన ఆస్తుల విలువ వడ్డీకే సరిపోవడంతో ఈ బకాయిలు ఎలా వసూలు చేసుకోవాలో బ్యాంకులకు పాలుపోవడం లేదు.

అంతక ముందు విజయ్‌ మాల్యా, మరో ముగ్గురు డైరెక్టర్లను ఉద్దేశపూర్వక ఎగవేతదారులుగా యునైటెడ్‌ బ్యాంక్‌ ఆఫ్‌ ఇండియా (యూబీఐ) ప్రకటించింది. విజయ్‌ మాల్యాకు రుణం ఇచ్చిన సంస్థల్లో, ఈ ప్రకటన చేసిన తొలి బ్యాంకుగా యూబీఐ నిలిచిన సంగతి తెలిసిందే.

కింగ్‌ఫిషర్‌ ఎయిర్‌లైన్స్‌కు చెందిన విజయ్‌ మాల్యా, మరో ముగ్గురు డైరెక్టర్లు రవి నెడుంగాడి, అనిల్‌కుమార్‌ గంగూలీ, సుభాష్‌ గుప్తేలను ఉద్దేశపూర్వక ఎగవేతదార్లుగా పరిగణిస్తున్నట్లు యూబీఐ ఎగ్జిక్యూటివ్‌ డైరెక్టర్‌ దీపక్‌ నారంగ్‌ చెప్పారు. బ్యాంకుకు చెందిన ఫిర్యాదుల పరిష్కార విభాగం (జీఆర్‌సీ) సమావేశంలో ఈ నిర్ణయం తీసుకున్నారు.