బ్రిక్స్ దేశాలు సంయుక్తంగా ఏర్పాటు చేస్తున్న బ్యాంకుకు అధ్యక్షుడిగా ఐసీఐసీఐ బ్యాంక్ నాన్ ఎగ్జిక్యూటివ్ ఛైర్మన్ కేవీ కామత్‌ నియమితులయ్యారు. ఈ బ్యాంకుకు కేవీ కామత్‌‌ను అధ్యక్షుడిగా నియమించినట్టు ఆర్థిక శాఖ కార్యదర్శి రాజీవ్ మెహ్రిషి తెలిపారు. ఈ పదవిలో కామత్ ఐదేళ్ళు కొనసాగుతారు.

ఈ మేరకు కేంద్ర ప్రభుత్వం ఆయన పేరుని ఖరారు చేసింది. బ్రెజిల్, రష్యా, ఇండియా, చైనా, దక్షిణాఫ్రికా కలిసి బ్రిక్స్ బ్యాంకును ఏర్పాటు చేసుకున్నాయి. అభివృద్ధి చెందుతున్న దేశాల్లో మౌలిక సదుపాయాల ప్రాజెక్టులకు నిధులు కల్పించే లక్ష్యంగా గతేడాది బ్రెజిల్‌‍లో జరిగిన బ్రిక్స్ దేశాల శిఖరాగ్ర సమావేశాల్లో ఈ బ్యాంకు ఏర్పాటుకు నిర్ణయం తీసుకున్నారు.

అంతేకాదు వంద బిలియన్‌ డాలర్ల అభివృద్ధి బ్యాంకుకు భారత్‌ అధ్యక్షత వహించేందుకు అంగీకారం కుదిరిన సంగతి తెలిసిందే. 67 ఏళ్ల కామత్‌ 1971లో ఐసీఐసీఐ బ్యాంక్‌లో తన కెరీర్‌ ప్రారంభించారు. ఆ తర్వాత ఆసియన్‌ డెవలప్‌మెంట్‌ బ్యాంక్‌కి వెళ్లి కొంతకాలం సేవలందించారు.

తిరిగి మళ్లీ 1996లో ఐసీఐసీఐ ఎండీ, సీఈవోగా నియమితులయ్యారు. 2009లో ఆ పదవి నుంచి రిటైరై నాన్‌ ఎగ్జిక్యూటివ్‌ ఛైర్మన్‌గా కొనసాగుతున్నారు. ప్రస్తుతం ఇన్ఫోసిస్‌ ఛైర్మన్‌గా కూడా కొనసాగుతున్నారు.