విజయవాడ: మొండి బకాయిలను వసూలు చేసేందుకు ఆంధ్రా బ్యాంక్ ఉద్యోగులు గురువారం వినూత్న రీతిలో నిరసన తెలిపారు. విజయవాడ జోన్ పరిధిలో రూ. కోట్లలో బకాయిపడ్డ వారి ఇళ్లు, కార్యాలయాల వద్దకు వెళ్లి మౌన ప్రదర్శన చేశారు. బకాయిలు వెంటనే చెల్లించాలంటూ ఫ్లకార్డులు ప్రదర్శించారు.

విజయవాడ సత్యనారాయణపురం, సీతారాంపురం, జగ్గయ్యపేటలోని బకాయిదార్ల ఇళ్ల ఎదుట నిరసనకు దిగారు. ఆంధ్రాబ్యాంక్ అధికారులు, సిబ్బంది, యూనియన్ నాయకులు ఈ కార్యక్రమంలో పాల్లొన్నారు.

బ్యాంకు డిప్యూటీ జనరల్ మేనేజర్ జిఎస్‌వి. కృష్ణారావు మాట్లాడుతూ రుణగ్రహీతలు ఇకనైనా తన బాధ్యతను గుర్తించి బకాయిలు చెల్లించాలన్నారు. ఇదే తరహా నిరసన కార్యక్రమాలను ఆంధ్రాబ్యాంక్ ఉద్యోగ సంఘాలు హైదరాబాద్‌లో కూడా నిర్వహించారు.

బకాయిలను వెంటనే చెల్లించాలని దాంతో బ్యాంకు భవిష్యత్తును కాపాడటంతో పాటు కొత్తగా అవసరమైన వారికి రుణాలు ఇచ్చేందుకు వీలు కలుగుతుందని చెప్పారు.