న్యూఢిల్లీ: ఆర్ధిక ఇబ్బందులతో సతమతమవుతున్న దేశీయ విమానయాన సంస్ధ స్పైస్‌జెట్.. ఈనెలాఖరు వరకు దేశ్యాప్తంగా అన్ని మార్గాల్లో నడిచే 1861 విమాన సర్వీసులను రద్దు చేసింది. సన్‌గ్రూపు అధినేత కళానిధి మారన్‌కు చెందిన ఈ విమానయాన సంస్ధకు ఆర్థిక సమస్యలు మరింత ఎక్కువయ్యాయని కొత్త నిర్ణయం సంకేతాలిస్తుందని నిపుణులు భావిస్తున్నారు.

అడ్వాన్స్ బుకింగ్‌లకు సంబంధించి ఆదేశాలను బేఖాతరు చేసినందున సంస్థకు డీజీసీఏ షోకాజు నోటీసులు జారీ చేయనున్నట్లు తెలుస్తొంది. మంగళవారం నుంచి నెలరోజులకు పైబడి అడ్వాన్స్ బుకింగ్‌లను స్వీకరించరాదని సంస్థను డీజీసీఏ ఇప్పటికే ఆదేశించిన విషయం తెలిసిందే.

మరోవైపు రూ.200 కోట్ల బకాయిలకు బ్యాంక్ గ్యారెంటీలు సమర్పించలేకపోతే సంస్థ నుంచి ఎప్పటికప్పుడే విమానాశ్రయ సర్వీసు చార్జీలను వసూలు చేయాలని ఎయిర్‌పోర్ట్ అథారిటీ ఆఫ్ ఇండియా(ఏఏఐ) యోచిస్తుంది.

స్పైస్‌జెట్‌ ఎయిర్ లైన్‌కు కేటాయించిన 186 స్లాట్స్‌ను శుక్రవారం డీజీసీఏ వెనక్కి తీసుకుంది. రాబోయే 10 రోజుల్లో ఉద్యోగులకు చెల్లించాల్సిన వేతనాలను చెల్లించాలని కోరింది. చూస్తుంటే రెండేండ్ల క్రితం కింగ్‌ఫిషర్ ఎయిర్‌లైన్స్‌కు ఎదురైన పరిస్థితులు గుర్తుకొస్తున్నాయని, చివరికి కింగ్‌ఫిషర్‌ ఎయిర్ లైన్స్‌లాగే ఈ సంస్థ కూడా మూతపడే అవకాశాలు లేకపోలేదని నిపుణులు అభిప్రాయపడుతున్నారు.