న్యూఢిల్లీ: భారత్‌లో 500 విక్రయ కేంద్రాలను ఏర్పాటు చేసే ఉద్దేశంలో ఆపిల్ ఇంక్ ఉంది. దేశంలోని ద్వితీయ, తృతీయ శ్రేణి నగరాలతో కలుపుకొని ఆపిల్ ఉత్పత్తులను చిన్న నగరాలకు కూడా అందుబాటులోకి తీసుకు వచ్చే లక్ష్యంతో ఈ కంపెనీ పని చేస్తోందని టెలికాం పరిశ్రమ వర్గాలు చెబుతున్నాయి.

ప్రధానంగా ఢిల్లీ, బెంగళూరు, ముంబయి, కోల్‌కతా వంటి నగరాల నుండి కంపెనీకి ఎక్కువగా అమ్మకాలు ఉన్నాయి. ప్రపంచవ్యాప్తంగా కంపెనీకి ఉన్న భారీ విక్రయ కేంద్రాల లాంటి వాటినే ఈ ప్రాంతాల్లోను ఏర్పాటు చేయాలని భావిస్తోందని తెలుస్తోంది.

కాగా, మహిళా వినియోగదారులను లక్ష్యంగా చేసుకుని యాపిల్‌ 4 అంగుళాల ఐఫోన్‌ను వచ్చే ఏడాది మార్కెట్లోకి తేనుంది. వన్‌ హ్యాండ్‌ ఆపరేషన్‌ (కేవలం ఒక చేతితోనే ఫోన్‌ను ఆపరేట్‌ చేయడం) సౌకర్యం కల్పించడం కోసమే 4 అంగుళాల ఐఫోన్‌ను కంపెనీ రూపొందిస్తోంది.

ఈ మోడల్‌ ఫోన్లను పరిమిత సంఖ్యలో మాత్రమే విడుదల చేయాలని భావిస్తోంది. ఇప్పటికే 4 అంగుళాల డిస్‌ప్లేతో ఐఫోన్‌ 5సి, 5 ఎస్‌ ఫోన్లను యాపిల్‌ విక్రయిస్తోంది. వచ్చే ఏడాది నుంచి ఐఫోన్‌ 5సి అమ్మకాలను నిలిపివేయాలని భావిస్తోంది.