న్యూఢిల్లీ: ఐసిఐసిఐ బ్యాంక్ సిఈఓ, మేనేజింగ్‌ డైరెక్టర్‌ చందా కొచ్చార్‌కు కెనడాలోని కార్ల్‌టన్‌ విశ్వవిద్యాలయం డాక్టర్‌ ఆఫ్‌ లా గౌరవ పట్టాను బహూకరించింది. బ్యాంకింగ్‌ రంగంలో ఆమె చేస్తున్న కృషిని గుర్తించి గౌరవ డిగ్రీ పట్టాతో ఆమెను సన్మానించింది.

దేశ ఆర్థిక వ్యవస్థ సంక్షోభ సమయంలో చందా కొచ్చార్‌ తన పటిష్టమైన నాయకత్వంతో బ్యాంకును సమర్థవంతంగా నిర్వహించిన తీరును అభినందిస్తూ ఆమెక ఈ డిగ్రీని ఇస్తున్నామని కార్ల్‌టన్ విశ్వవిద్యాలయం పేర్కొందని ఐసీఐసీఐ బ్యాంక్ ఒక ప్రకటనలో తెలిపింది.

కెనడా-ఇండియా మధ్య బలపడుతున్న సంబంధాలకు, సమన్వయ కార్యకలాపాలకు ఈ అవార్డు చిహ్నమని చందా కొచ్చర్ తెలిపారు. గతంలో ఈ గౌరవ డాక్టరేట్‌ను అందుకున్నవారిలో నోబెల్ గ్రహీతలు అంగ్ సాంగ్ సూకీ, గెర్హార్డ్ హెర్జ్‌బర్గ్, కోఫీ అన్నన్‌తోపాటు సోవియట్ యూనియన్ మాజీ అధ్యక్షుడు మైకేల్ గోర్బచేవ్ ఉన్నారు.

ఒట్టావాలోని యూనివర్సిటీ క్యాంపస్‌లో ఇటీవల జరిగిన కార్యక్రమంలో కొచ్చర్‌కు డాక్టరేట్ అందజేశారు.