చెన్నై: నోకియా కార్పొరేషన్‌ తన చెన్నై ఫ్యాక్టరీని మూసివేస్తూ తీసుకున్న నిర్ణయాన్ని చట్టపరంగా ఎదుర్కొంటామని నోకియా ఇండియా ఉద్యోగ సంఘాలు ప్రకటించాయి. చెన్నై ఫ్యాక్టరీని నవంబర్‌ 1 నుంచి మూసివేయనున్నట్టు మంగళవారం నోకియా ప్రకటించిన విషయం తెలిసిందే.

ప్రస్తుతం ఈ ఫ్యాక్టరీలో 900 మంది ఉద్యోగులు పని చేస్తున్నారు. ఇందులో అధిక శాతం మంది మహిళలు. ఈ ఫ్యాక్టరీని మూసివేస్తూ నోకియా తీసుకున్న నిర్ణయం నిబంధనలకు విరుద్ధమని, ఉద్యోగుల భవిష్యత్‌కు భరోసా కల్పించాల్సిందిగా నోకియా ఇండియా ఉద్యోగ సంఘాల ప్రెసిడెంట్‌, సిట్టింగ్‌ ఎంఎల్‌ఎ ఎ సౌందర రాజన్‌ కోరారు.

ఈ వారంలో ఉద్యోగులతో సమావేశమై తదుపరి చర్యల గురించి చర్చిస్తామన్నారు. సిబ్బందికి న్యాయం జరిగే విధంగా చట్టపరమైన మార్గాలను ఎంచుకుంటామని ఆయన తెలిపారు. కార్మిక శాఖను కలిసి, తమ సమస్యను విన్నవిస్తామని వెల్లడించారు.

నోకియా మొబైల్‌ ఫోన్ల ఉత్పత్తి వ్యాపారాన్ని మైక్రోసాఫ్ట్‌ 720 కోట్ల డాలర్లకు కొనుగోలు చేసిన నేపథ్యంలో... నోకియా తన 6,600 మంది ఉద్యోగులకు స్వచ్ఛంద పదవీ విరమణ పథకాన్ని ప్రకటించింది. దీన్ని వినియోగించుకుని 5,700 మంది సంస్థ నుంచి తప్పుకున్నారు. మిగతా వారు మాత్రం కంపెనీలోనే కొనసాగారు.