న్యూఢిల్లీ: కంప్యూటర్, ప్రింటింగ్ పరికరాల తయారీలో ప్రముఖ సంస్దగా ఎదిగిన టెక్నాలజీ దిగ్గజం హ్యూలెట్ ప్యాకార్డ్ (హెచ్‌పీ) రెండు సంస్దలుగా విడిపోనుంది. పర్సనల్ కంప్యూటర్స్, ప్రింటింగ్ బిజినెస్‌లతో కూడిన యూనిట్ ఒక సంస్దగానూ, ఎంటర్‌ప్రైజ్ టెక్నాలజీ ఇన్‌ఫ్రాస్ట్రక్చర్, సాప్ట్‌వేర్ సర్వీసుల బిజినెస్‌లు మరో కంపెనీగా ఏర్పాటు కానున్నాయి.

ఫార్చూన్ 50లో భాగంకానున్న ఈ రెండు సంస్దలూ విడిగా లిస్టింట్ కానున్నాయి. పర్సనల్ కంప్యూటర్స్, ప్రింటింగ్ బిజినెస్‌లతో కూడిన యూనిట్‌కు ప్రస్తుత హెచ్‌పీ (లోగో)తో కొనసాగనుంది. ఎంటర్‌ప్రైజ్ టెక్నాలజీ ఇన్‌ఫ్రాస్ట్రక్చర్, సాప్ట్‌వేర్ సర్వీసుల బిజినెస్‌ యూనిట్‌ను హ్యూలెట్ ప్యాకార్డ్ ఎంటర్ ప్రైజ్ పేరుతో నిర్వహించనుంది. ఈ వివరాలను కంపెనీ ఒక ప్రకటనలో పేర్కొనుంది.

2015 చివరికల్లా పూర్తి కానున్న ఈ విభజనలో భాగంగా వాటాదారులకు రెండు కంపెనీల షేర్లను కేటాయించనున్నారు. కంప్యూటర్, ప్రింటింగ్ రంగాల్లో మరింత వృద్ధి సాధించే దిశగా రెండుగా విడిపోనున్న హెచ్‌పీ, తన ఉద్యోగుల్లో 5 వేల మందికి ఉద్వాసన పలికేందుకు సన్నాహాలు చేస్తోంది.

సాధారణంగా కార్పోరేట్ సంస్థలు తమ కార్యకలాపాలు విస్తరించే దిశలో రెండుగా విడిపోయే సందర్భాల్లో ఉద్యోగాల సంఖ్య పెరుగుతుండటంతో పాటు, ఉద్యోగాలపై కోత పడుతున్న విషయం తెలిసిందే. సంస్థ పునర్వవస్థీకరణలో భాగంగానే ఉద్యోగాలపై కోత విధించక తప్పడం లేదని సంస్థ చెబుతోంది.

హెచ్‌పీ సంస్ద రెండుగా చీలిపోవడంతో సంస్థలోని ఉద్యోగుల్లో ఎవరిపై వేటు పడుతుందోనన్న ఆందోళన మొదలైంది.