న్యూఢిల్లీ: విమానయాన సంస్దలు ప్రయాణీకులకు ఆఫర్ల మీద ఆఫర్లు ప్రకటిస్తున్నాయి. ఇటీవల దేశంలోని పలు విమాన సంస్దలు రూ. వెయ్యికి లోపే ప్రయాణ ఛార్జీని ప్రకటించిన సంగతి తెలిసిందే.

ఇప్పడు ఇంకో అడుగు ముందుకేసిన ఇండిగో అధ్బుతమైన ఆఫర్‌ను ప్రయాణీకులకు అందిస్తుంది. అసలు పైసా కూడా చెల్లించకుండా ఇండిగో విమానాల్లో సీట్లు బుక్ చేసుకోవచ్చంటూ సరికొత్త ఆఫర్‌ను ప్రకటించింది.

ఈ ఆఫర్‌లో భాగంగా ఇండిగో విమానంలో సీటు బ్లాక్ చేసుకోవచ్చు. ఈ బ్లాకింగ్ ఆరు గంటల పాటు వరకు ఉంచుకోవచ్చు. ఆరుగంటల్లోగా టికెట్ ధర చెల్లిస్తే సీటు వారిదే అవుతుంది. లేదంటే సీటు రద్దవుతుంది.

దీనికోసం మొదట ఇండిగో వెబ్‌‌సైట్‌లో రిజిస్టర్ కావాలి. ఆ తర్వాత ప్రయాణీకులు కావాల్సిన విమానాన్ని ఎంచుకుని "పే లేటర్" అనే బటన్‌ని క్లిక్ చేయాలి. దీంతో ప్రయాణీకులకు ఒక పీఎన్ఆర్ నెంబర్ వస్తుంది.

పీఎన్ఆర్ నెంబర్ సరిచూసుకున్న తర్వాత ఆరు గంటల్లోపు డబ్బు చెల్లించాల్సి ఉంది, లేని పక్షంలో టికెట్ రద్దవుతుంది. ఈ ఆఫర్ 72 గంటల తర్వాత చేసే ప్రయాణాలకు మాత్రమే వర్తిస్తుందని పేర్కొంది. ఈ ఆఫర్‌కు సంబంధించన విషయాన్ని ఇండిగో తన ట్విట్టర్, ఫేస్‌బుక్ పేజీల్లో పోస్ట్ చేసింది.