హైదరాబాద్: ఐసీఐసీఐ బ్యాంక్ ఒక కొత్త స్కీమ్‌ను ప్రవేశ పెట్టింది. ఈ స్కీమ్ ద్వారా కార్డు లేకుండానే నగదు విత్ డ్రా చేసుకునే ఈ సదుపాయన్ని దేశవ్యాప్తంగా ఉన్న 10,000 ఐసీఐసీఐ ఏటీఎం బ్యాంకుల నుంచి పొందవచ్చు. ఈ స్కీమ్ ద్వారా ఈ బ్యాంక్ ఖాతాదారులు దేశంలో ఎవరికైనా తమ ఖాతా నుంచి నగదు బదిలీ చేయవచ్చు.

నగదు అందుకునే వారికి దేశంలోని ఏ బ్యాంకులోనూ ఖాతా ఉండక్కర్లేదు. మొబైల్ నెంబర్, అడ్రస్ ఉంటే చాలు. డబ్బులు స్వీకరించే వ్యక్తి మొబైల్ నెంబర్‌కు ఆరు అంకెల రహస్య కోడ్‌ను పంపిస్తారు. ఈ నెంబర్‌తో సదరు వ్యక్తి ఏ ఐసీఐసీఐ బ్యాంక్ ఏటీఎం నుంచైనా డబ్బులను విత్ డ్రా చేసుకోవచ్చు.

డబ్బులు పంపించిన రెండు రోజుల్లోగా వాటిని విత్ డ్రా చేసుకోవాల్సి ఉంటుంది. ఎలక్ట్రానిక్ చెల్లింపులు బాగా పెరిగిపోయిన నేపథ్యంలో ఇలాంటి వినూత్నమైన సర్వీస్‌ను అందిస్తున్నామని ఐసీఐసీఐ బ్యాంక్ ఎగ్జిక్యూటివ్ డైరెక్టర్ రాజీవ్ సభర్వాల్ పేర్కొన్నారు.

ఈ కార్డె లెస్ క్యాష్ విత్ డ్రాయల్ కారణంగా తమ ఖాతాదారుల కుటుంబ సభ్యులు, మిత్రులు సులభంగా డబ్బులను పొందవచ్చని వివరించారు. ఈ సేవలు బ్యాంకు ఖాతాదారు కూడా పొందవచ్చు. తన డెబిట్ కార్డును ఉపయోగించకుండానే నగదు విత్ డ్రా చేసుకోవచ్చు.