హైదరాబాద్: సెమీ కండక్టర్ హబ్‌గా రూపొందించడానికి అత్యంత ప్రతిష్టాత్మకంగా చేపట్టిన ఫ్యాబ్ సిటీ 2008 నుంచి కంపెనీలను ఆకర్షించడంలో విఫలం కావడంతో ఆ స్థలంలో ఈ సిటీని అభివృద్ధి చేయాలని తెలంగాణ ప్రభుత్వం భావిస్తోంది. ఫ్యాబ్ సిటీ కోసం గత వైయస్ రాజశేఖర రెడ్డి ప్రభుత్వం 1,050 ఎకరాల భూమిని కేటాయించింది. ఆ సెజ్‌ను సెమీ కండక్టర్ తయారీ కంపెనీలకు కేటాయించింది.

రంగారెడ్డి జిల్లా మహేశ్వరం మండలం రావిరాల గ్రామం వద్ద కేటాయించిన ఆ స్థలంలో ఆరేళ్ల తర్వాత కూడా 64 ఎకరాలు మాత్రమే ఉపయోగంలోకి వచ్చింది. ప్రస్తుతం ఖాళీగా ఉన్న మిగతా భూమిని కెసిఆర్ ప్రభుత్వం ఈసిటీగా రూపొందించాలని భావిస్తోంది.

ఎలక్ట్రానిక్ పరిశ్రమలను ఈ సిటీలో ప్రోత్సహించాలనే ఉద్దేశంతో ప్రభుత్వం ఉంది. ఫ్యాబ్ సిటీ భూమిని వాడుకుని ఈసిటీగా రూపుదిద్దే విషయంపై ఐటి మంత్రి కెటి రామారావు ఇది వరకే అధికారులతో పలుమార్లు చర్చించారు

దాదాపు 600, 400 ఎకరాల్లో ఎలక్ట్రానిక్ క్లష్టర్స్‌ను ఏర్పాటు చేసే విషయంపై కెటి రామారావు ప్రణాళికను రూపొందిస్తున్నారు. అందుకు అవసరమైన మౌలిక సదుపాయాల కల్పనకు చర్యలు చేపట్టారు.