గన్నవరం: విజయవాడ నుంచి హైదరాబాద్ మీదుగా చెన్నై ఎయిర్‌కోస్టా విమాన సర్వీసు శుక్రవారం ప్రారంభమైంది. విమానాశ్రయం డైరెక్టర్ బిజి పాటిల్, ఎయిర్ కోస్టా పరిపాలనా విభాగం జనరల్ మేనేజర్ కె. వినయ్ జ్యోతి వెలిగించి సర్వీసును లాంఛనంగా ప్రారంభించారు.

ఈ సందర్భంగా విమానాశ్రయం డైరెక్టర్ పాటిల్ మాట్లాడుతూ.. రాష్ట్ర విభజన అనంతరం విజయవాడ విమానాశ్రయం ప్రధానంగా మారిందని అన్నారు. ప్రయాణికులు సౌకర్యార్థం ఇప్పటికే టర్మినల్ విస్తరణ, సకాలంలో లేజీ సేకరించుకునేందుకు కన్వేయర్ బెల్ట్ ఏర్పాటు, ఆప్రాన్‌ల పటిష్టత ఇలా అన్ని రకాల సేవలను అభివృద్ధి చేస్తున్నామని చెప్పారు.

ఇంకా విమానాశ్రయం విస్తరణ, అభివృద్ధి కోసం ప్రణాళికలు సిద్ధంగా ఉంచామని, సర్వీసులు పెరిగే కొద్ది సౌకర్యాలను మెరుగుపరుస్తామని, ప్రభుత్వ ప్రోత్సాహకాలతో మరింత ముందుకు సాగుతామని వివరించారు.

ప్రయాణికుల అవసరం దృష్ట్యా ఎయిర్ కోస్టా రెండో సర్వీసు ప్రారంభించడం అభినందనీయమని అన్నారు. ఈ సర్వీసు చివరి మజిలీ మధురై అని తెలిపారు. 35 మంది ప్రయాణికులతో 7.45 గంటలకు ఎయిర్ కోస్టా విమానం హైదరాబాద్ బయలుదేరి వెళ్లింది.