న్యూఢిల్లీ: భారత్ వృద్ధిపథంలో పయనిస్తోందని ప్రధానమంత్రి మన్మోహన్ సింగ్ అన్నారు. బుధవారం జరిగిన ప్రణాళికా సంఘం సభ్యుల సమావేశంలో ప్రధాని మన్మోహన్ సింగ్ తన తుది ప్రసంగం చేశారు. భారత్ మళ్లీ అభివృద్ధి పథంలో నడుస్తోందని తెలిపారు. అయితే ఇంకా కొంత స్తబ్ధత ఉందని.. అది కూడా పోవాల్సి ఉందని అని ప్రణాళికా సంఘం అధ్యక్షుడి హోదాలో ఉన్న మన్మోహన్ సింగ్ వ్యాఖ్యానించారు.

స్వేచ్ఛగా పెరుగుతున్న ఆర్థిక వ్యవస్థలో ప్రణాళికా సంఘం పాత్ర ప్రతిబింబించేలా ఉండాలని ఆయన ఆకాంక్షించారు. గడిచిన పదేళ్ల కాలంలో యూపిఏ పాలనలో ప్రణాళికా సంఘం పనితీరుపై ఈ సందర్భంగా మన్మోహన్ సంతృప్తిని వ్యక్తం చేశారు. ఇకముందూ దేశ అభివృద్ధిలో, ప్రభుత్వ విధానాల్లో ఇలాగే ప్రణాళికా సంఘం భాగస్వామ్యయుతంగా ఉండాలని ఆకాంక్షించారు.

ప్రస్తుత రాష్టప్రతి ప్రణబ్ ముఖర్జీ.. ప్రణాళికా సంఘం ఉపాధ్యక్షుడిగా ఉన్నప్పుడు ఆయన నుంచి తనకెంతో మద్దతు లభించిందని ఈ సందర్భంగా మన్మోహన్ గుర్తుచేసుకున్నారు. ఈ పదేళ్ల కాలంలోనూ ప్రణాళికా సంఘం ప్రభుత్వానికి అభివృద్ధి విషయంలో ఎంతో సహకారాన్ని అందించిందని చెప్పారు.

కాగా, ప్రణాళికా సంఘంతో మన్మోహన్ అనుబంధం 1980 ఏప్రిల్‌లో మొదలైంది. నాడు కార్యదర్శిగా పనిచేసిన ఆయన తదనంతర కాలంలో రాజీవ్ గాంధీ ప్రధానిగా ఉన్న సమయంలో ప్రణాళికా సంఘం ఉపాధ్యక్షుడిగా కూడా పనిచేశారు. అంతేగాక 1991, 1996 మధ్య కాలంలో కేంద్ర ఆర్థిక మంత్రిగా కూడా మన్మోహన్ సింగ్ పని చేశారు.