న్యూఢిల్లీ/హైదరాబాద్: బంగారం దిగుమతులపై విధించిన ఆంక్షలను సమీక్షించాలన్న డిమాండ్‌కు కేంద్ర వాణిజ్య, పరిశ్రమల శాఖ మంత్రి ఆనంద్ శర్మ పరోక్షంగా మద్దతు పలికారు. బంగారం దిగుమతులపై ఉన్న ఆంక్షలు స్మగ్లింగ్‌కు దారితీస్తున్నాయని ఆయన పిటిఐకి తెలిపారు. ఈ నేపథ్యంలో నిబంధనలను సమీక్షిస్తే బాగుంటుందని తాను భావిస్తున్నానని ఆనంద్ చెప్పారు. కరెంట్ ఖాతా లోటు (క్యాడ్)ను కట్టడి చేయడానికి ప్రభుత్వం బంగారం దిగుమతులపై సుంకాన్ని పెంచిన విషయం తెలిసిందే.

దిగుమతి చేసుకున్న బంగారంలో కొంత భాగాన్ని ఎగుమతి చేయాలని రిజర్వు బ్యాంక్ ఆఫ్ ఇండియా నిబంధనలు విధించింది. ఫలితంగా బంగారం దిగుమతులు తగ్గడం మొదలైంది. దీని వల్ల దేశీయ మార్కెట్లో పసిడి కొరత ఏర్పడుతోందని, దీనిని నివారించేందుకు ఆంక్షలు సడలించాలని బంగారం వ్యాపారులు ప్రభుత్వాన్ని కోరుతున్నారు. ఈ నేపథ్యంలో అటు వ్యాపారులకు ఇబ్బంది కలగకుండా ఇటు క్యాడ్ పెరగకుండా ఉండేలా సమతౌల్య విధానాన్ని అనుసరించాల్సిన అవసరం ఎంతైనా ఉందని శర్మ అభిప్రాయపడ్డారు.

దేశ మొత్తం ఎగుమతుల్లో వజ్రాలు, ఆభరణాల ఎగుమతుల వాటా 15 శాతం వరకు ఉంది. ఫిబ్రవరి నెలలో ఈ రంగం ఎగుమతులు 4.18 శాతం క్షీణించి 359 కోట్ల డాలర్లకు చేరుకున్నాయి. ఈ ఆర్థిక సంవత్సరం మొదటి 11 నెలలకాలంలో ఎగుమతులు 7.15 శాతం మేర తగ్గి 3,573 కోట్ల డాలర్లకు చేరాయి. ఫిబ్రవరిలో బంగారం, వెండి దిగుమతులు 71.4 శాతం క్షీణించి 163 కోట్ల డాలర్లుగా నమోదయ్యాయి.

విశాఖలో ఏపిఐ ప్లాంట్

హైదరాబాద్: కాంట్రాక్టు రీసెర్చ్, ఉత్పత్తుల రంగంలో ఉన్న జివికె బయోసైన్సెస్ ప్రస్తుత, కొత్త కస్టమర్ల అవసరాల దృష్టిలో ఉంచుకొని 100 కోట్ల రూపాయలతో విశాఖపట్నంలో యాక్టివ్ ఫార్మాస్యుటికల్ ఇన్‌గ్రిడియెంట్స్ (ఎపిఐ) ఉత్పత్తి కేంద్రాన్ని ఏర్పాటు చేస్తోంది. శుక్రవారంనాడు సంస్థ ఉత్పత్తి కేంద్రాన్ని సందర్శించిన మీడియాంతో.. జివికె బయోసైన్సెస్ చీఫ్ ఎగ్జిక్యూటివ్ ఆఫీసర్ మన్ని కంటిపూడి మాట్లాడారు.

విశాఖపట్నంలోని ఫార్మా సెజ్‌లో కొత్త ఎపిఐ ప్లాంట్ నెలకొల్పే యోచన ఉందని అయితే దీన్ని ఇంకా ఖరారు చేయలేదని చెప్పారు. జూన్ తర్వాత దీనిపై ఒక స్పష్టత వచ్చే అవకాశం ఉందని అన్నారు. ఎపిఐ ప్లాంట్ కోసం విశాఖపట్నంతో పాటు మరో రెండు ప్రాంతాలు కూడా పరిశీలనలో ఉన్నట్టు చెప్పారు.