తిరువనంతపురం: కేరళ రాష్ట్ర పర్యాటక శాఖ ఆయూర్వేదంపై ఆన్‌లైన్ వీడియో క్విజ్ నిర్వహించేందుకు ఏర్పాట్లు చేసింది. ఈ పోటీలో పాల్గొనడం ద్వారా ప్రపంచ వ్యాప్తంగా పేరుపొందిన కేరళ ఆయుర్వేదిక్ రిజువనేషన్ థెరపీ (కేరళ ఆయుర్వేద కాయకల్ప చికిత్స) ట్రీట్‌మెంట్ ఉచితంగా పొందే అవకాశాన్ని కల్పిస్తోంది.

ఇందుకోసమే కేరళ పర్యాటక శాఖ మార్కెట్ గమ్యస్థానాల కోసం వినూత్నంగా ఒక కొత్త పథకం ద్వారా ఈ ఆన్‌లైన్ వీడియో క్విజ్‌ ను నిర్వహిస్తోంది. 30 రోజులపాటు జరిగే ఈ ప్రచార కార్యక్రమంలో పర్యాటకులకు, ప్రజలకు ఆయుర్వేదంపై అవగాహన కల్పించనుంది. ఈ పోటీల్లో ఆయుర్వేదంపై రూపొందించిన తేలికైన ప్రశ్నలను పొందిపరిచినట్లు నిర్వాహకులు తెలిపారు.

పోటీల్లో పాల్గొన్న వ్యక్తులు ఆ ప్రశ్నలకు సమాధానాలు ఇచ్చిన 24 గంటల్లోపూ వారు ఇచ్చిన జవాబులకు సరైనవి సమర్పించడం జరుగుతుందని చెప్పారు. ఈ పోటీల్లో గెలుపొందిన 15 మందికి మూడు రోజుల ఆయుర్వేద ప్యాకేజీని ఉచితంగా అందజేయడం జరుగుతుందని తెలిపారు.

ఈ పోటీల్లో పాల్గొనాలని భావిస్తున్న అభ్యర్థులు ముందుగా రిజిష్టర్ చేయించుకోవాల్సి ఉంటుంది. www.keralatourism.org. వెబ్ సైట్‌లో ఇందుకు సంబంధించిన పూర్తి వివరాలు లభిస్తాయని నిర్వాహకులు పేర్కొన్నారు. కేరళ పర్యాటక శాఖకు సంబంధించిన ఇన్విస్ మల్టీమీడియా ఐటీ సొల్యూషన్స్ ఈ కార్యక్రమాన్ని నిర్వహిస్తోంది.