హైదరాబాద్: ఆరోగ్యశ్రీ హెల్త్ కేర్ ట్రస్ట్ అమలు చేస్తున్న వివిధ ఆరోగ్య పథకాలను ఆంధ్రప్రదేశ్ రాష్ట్ర రోడ్డు రవాణా సంస్థ ద్వారా ప్రచారం చేసేందుకు కావాల్సిన మొత్తాన్ని స్టేట్ బ్యాంక్ ఆఫ్ హైదరాబాద్ ఆరోగ్యశ్రీ ట్రస్ట్‌కు అందజేసింది. ప్రచారానికి కావాల్సిన ఖర్చు రూ. 3,50,000ల చెక్కును ఎస్‌బిహెచ్ ఆరోగ్యశ్రీ ట్రస్ట్‌కు అందజేసింది.

సెక్రటేరియట్ శాఖ ద్వారా ఆరోగ్యశ్రీ హెల్త్ కేర్ ట్రస్ట్ చీఫ్ ఎగ్జిక్యూటివ్ అధికారులు ధనుంజయరెడ్డి, సిరాజుద్దీన్ రెహ్మాన్‌కు అందజేశారు. సదరు వితరణ ద్వారా ట్రస్ట్‌కు సంబంధించిన 104 సేవలను ప్రతి జిల్లాకు రెండు బస్సుల ద్వారా ప్రచారం చేసేందుకు వినియోగించనున్నారు.

అవసరమున్న ప్రజలకు ఈ ప్రచారం ఆరోగ్యశ్రీ పథకాలను తెలియజేసేందుకు ఉపయోగపడుతుందని స్టేట్ బ్యాంక్ ఆఫ్ హైదరాబాద్, సెక్రటేరియట్ బ్రాంచి అసిస్టెంట్ జనరల్ మేనేజర్ కె నాగేశ్వర రావు తెలిపారు.