ముంబై/హైదరాబాద్: ఇన్ఫర్మేషన్ టెక్నాలజీ రంగ పరిశ్రమల ఫలితాలను గమనించినట్లయితే ఆ రంగానికి మంచి రోజులు వచ్చినట్లే కనిపిస్తోంది. ఇటీవల తమ కంపెనీల ఫలితాలను ప్రకటించిన ఐటీ కంపెనీలు లాభాలను భారీగా పెంచుకున్నాయి. దేశీయ ఐటి దిగ్గజాలు టాటా కన్సల్టెన్సీ సర్వీస్ (టిసిఎస్), ఇన్ఫోసిస్, హెచ్‌సిఎల్ టెక్నాలజీస్ లాంటి కంపెనీలు డిసెంబర్‌తో ముగిసిన త్రైమాసికంలో అద్భుతమైన ఫలితాలతో అదరగొట్టాయి. టాప్ 5 కంపెనీల్లో మూడు కంపెనీలు ప్రోత్సాహకరమైన ఫలితాలు ప్రకటించడంతో మరో రెండు దిగ్గజ కంపెనీలు విప్రో, టెక్ మహీంద్రా ఫలితాల కోసం మార్కెట్ ఆసక్తిగా ఎదురుచూస్తోంది.

అంచనాలను మించి రాణించిన టిసిఎస్

ఐటి దిగ్గజ కంపెనీ టిసిఎస్ మూడో త్రైమాసిక ఫలితాల్లోనూ అంచనాలను మించి రాణించింది. డిసెంబర్ 31తో ముగిసిన మూడు నెలల కాలంలో కంపెనీ ఏకీకృత లాభం 50.3 శాతం పైగా వృద్ధితో రూ. 5,333 కోట్లకు చేరింది. నిరుడు లాభం 3,550 మాత్రమే. రెండో త్రైమాసికం (రూ. 4,633 కోట్లు)తో పోలిస్తే తృతీయ త్రైమాసికం లాభంలో 15 శాతం వృద్ధి ఉంది. లైఫ్ సెన్సెస్, మీడియా, టెలికాం, ఉత్పత్తుల రంగంలోని ప్రాజెక్టులు, యూరప్‌లో కోలుకుంటున్న వ్యాపారాలు టిసిఎస్‌కు బాగా కలిసి వచ్చాయి.

ఏకీకృత ఆదాయాలు సైతం 32.5 శాతం వృద్ధి చెంది, రూ. 21,294 కోట్లకు చేరాయి. అంతక్రితం అక్టోబర్-డిసెంబరులో ఆదాయం రూ. 16, 070 కోట్లుగా ఉంది. అంతక్రితం త్రైమాసికంతో పోలిస్తే కంపెనీ నికర లాభం 15.1 శాతం, ఆదాయాలు 1.5 వాతం చొప్పున పెరిగాయి. మెరుగైన ఫలితాలు సాధించిన నేపథ్యంలో టిసిఎస్ తన నియామక లక్ష్యాన్ని పెంచింది. 2013-14లో అదనంగా 5వేల ఉద్యోగాలు జతచేస్తూ మొత్తం 55వేల నియామకాలు చేపడతామని ఈ సందర్భంగా కంపెనీ తెలిపింది.

లాభాల్లో 58శాతం వృద్ధి సాధించిన హెచ్‌సిఎల్

డిసెంబరుతో ముగిసిన త్రైమాసికంలో హెసిఎల్ టెక్నాలజీస్ రూ. 1,496 కోట్ల నికర లాభాన్ని సాధించింది. నిరుడు ఇదే కాలంలో కంపెనీ లాభం రూ. 944 కోట్ల. అంటే ఈ కంపెనీ నికర లాభం ఈసారి 58.4 శాతం పెరిగింది. యూరప్ వ్యాపారంలో వృద్ధి, ఆర్థిక సేవలు, మౌలిక సదుపాయాలు, తయారీ విభాగాల్లో దక్కిన ఆర్డర్లు మెరుగైన ఫలితాలు రావడానికి దోహదం చేశాయి.

2013లో హెచ్ సిఎల్ ఆదాయం 500 కోట్ల రూపాయలు దాటిందని, ఇన్‌ఫ్రా, ఉత్పాదక రంగంలోని తమ కంపెనీ ఆదాయం 150 కోట్ల డాలర్లను దాటిందని హెచ్‌సిఎల్ టెక్నాలజీస్ ప్రెసిడెంట్, సిఈఓ అనంత్ గుప్తా తెలిపారు. ఏకీకృత ఆదాయం 30.4 శాతం పెరిగి రూ. 6,278 కోట్ల నుంచి రూ. 8,184 కోట్లకు చేరింది. ఈ ఫలితాల నేపథ్యంలో గురువారం హెచ్ సిఎల్ షేరు 52 వారాల గరిష్టానికి చేరింది. చివరకు 4.23 శాతం లాభంతో రూ. 1,391.90 వద్ద స్థిరపడింది.

ఇన్ఫోటెక్ లాభంలో 12శాతం వృద్ధి

హైదరాబాద్: ఇన్ఫోటెక్ ఎంటర్ ప్రైజెస్ ప్రస్తుత ఆర్థిక సంవత్సరం మూడో త్రైమాసికానికి రూ. 69. 39 కోట్ల నికర లాభాన్ని ఆర్జించినట్లు ప్రకటించింది. నిరుడుతో పోల్చితే రాబడి 21.7 శాతం ( 475 కోట్ల రూపాయలు) పెరగగా నికర లాభం 12.3 శాతం (62 కోట్ల రూపాయలు) వృద్ధి చెందింది. నాలుగు త్రైమాసికాల తర్వాత కంపెనీ వ్యాపారం ఫ్లాట్‌గా ఉండటమే కాకుండా ఈ త్రైమాసికంలో వ్యాపారం గణనీయంగా వృద్ధి చెందిందని కంపెనీ చైర్మన్, మేనేజింగ్ డైరెక్టర్ బివిఆర్ మోహన్ రెడ్డి తెలిపారు. దీంతో ద్వితీయార్థంలో పటిష్ఠమైన వృద్ధిని నమోదు చేసుకోవచ్చని భావిస్తున్నట్ల ఆయన పేర్కొన్నారు.

సమీక్షా కాలంలో నిర్వహణా మార్జిన్లు 19.6 శాతంగా ఉండగా ఎఫెక్టివ్ టాక్స్ రేటు 27.2 శాతంగా ఉందని ఆయన పేర్కొన్నారు. టాప్ 20 కస్టమర్ల నుంచి వ్యాపారం పెరగటంతో వృద్ధి ఆశించిన స్థాయిలో ఉందని ఆయన తెలిపారు. మొత్తం ఆదాయంలో 56.50 శాతం అమెరికా నుంచి, 29.2 శాతం యూరప్ దేశాల నుంచి వస్తుందని తెలిపారు. ఆసియా, పసిపిక్-ఇతర దేశాల నుంచి 14.3శాతం లభిస్తోందని తెలిపారు. కాగా గురువారం బిఎస్ఇలో కంపెనీ షేరు 4.73 శాతం లాభంతో 346.85 రూపాయల వద్ద స్థిరపడింది.