న్యూఢిల్లీ: ప్రింటింగ్ ప్రెస్ ఖాళీ చేయడానికి సంబంధించిన కేసులో డెక్కన్ క్రానికల్ హోల్డింగ్ (డిసిహెచ్ఎల్)కి సుప్రీం కోర్టులో చుక్కెదురైంది. కోటక్ మహీంద్రాతో వివాదానికి సంబంధించి ఆంధ్రప్రదేశ్ హైకోర్టు జారీచేసిన ఉత్తర్వులను సవాలు చేస్తూ డెక్కన్ క్రానికల్ దాఖలు చేసిన పిటిషన్‌ను స్వీకరించడానికి సుప్రీంకోర్టు తిరస్కరించింది. డెక్కన్ క్రానికల్ హోల్డింగ్స్ ఆర్థిక సంస్థలు, బ్యాంకుల నుంచి భారీ ఎత్తున అప్పులు తీసుకుని చెల్లింపుల్లో డీఫాల్ట్ అయిన విషయం తెలిసిందే.

కోటక్ బ్యాంకు నుంచి తీసుకున్న 110 కోట్ల రూపాయల రుణానికి సంబంధించి రంగారెడ్డి జిల్లాలో ఉన్న ప్రింటింగ్ ప్రెస్‌ను ఫిబ్రవరి 28, 2014 నాటికి డెక్కన్ క్రానికల్ యాజమాన్యం ఖాళీ చేయాలంటూ రాష్ట్ర హైకోర్టు నవంబర్ 11న తీర్పునిచ్చింది. ఈ ఆదేశాలను సవాలు చేస్తూ దక్కన్ క్రానికల్ సుప్రీం కోర్టును ఆశ్రయించింది.

అయితే ఇరు పార్టీల ఆమోదంతోనే ఆంధ్రప్రదేశ్ హైకోర్టు ఉత్తర్వులు జారీ చేసినందున దక్కన్ క్రానికల్ దాఖలు చేసిన పిటిషన్ చెల్లదని కొటక్ తరఫు న్యాయవాది సుప్రీం కోర్టు ఎదుట అభ్యంతరాలను వ్యక్తం చేశారు. దీంతో కోటక్ తరఫు న్యాయవాది అభ్యంతరాలను పరిగణనలోకి తీసుకున్న జస్టిస్ బిఎస్ చౌహాన్.. పిటిషన్ ఉపసంహరణకు డెక్కన్ క్రానికల్‌కు అవకాశం ఇచ్చి, పిటిషన్ డిస్మిస్డ్ అండ్ విత్‌డ్రాన్ అని ప్రకటించారు.

కాగా అంతక్రితం హైకోర్టు ఇచ్చిన ఉత్తర్వుల సవరణలు కోరుతూ తిరిగి అదే కోర్టును ఆశ్రయించేలా డెక్కన్ క్రానికల్‌కు సుప్రీం కోర్టు వీలు కల్పించింది. దీంతో తొలి ఉత్తర్వుల్లో సవరణ కోరుతూ ఆంధ్రప్రదేశ్ హైకోర్టును ఆశ్రయిస్తామని డెక్కన్ క్రానికల్ న్యాయవాది సుప్రీం కోర్టుకు తెలిపారు.