బుధవారం వర్తక, వాణిజ్య సంఘాలతో ఆంధ్రప్రదేశ్ పోలీసు అకాడమిలో సమావేశానికి హాజరైన ఆయన ప్రసంగించారు. ప్రస్తుతం అమల్లో ఉన్న సేవా పన్ను స్వచ్ఛంద చెల్లింపుల ప్రోత్సాహక పథకం విసిఇఎస్ ఓ సువర్ణావకాశంగా అభివర్ణించిన ఆయన, రాబోయే 20 సంవత్సరాల్లో మళ్లీ ఇలాంటి పథకం రాబోదన్నారు. ఈ పథకం ఈ నెల 31వ తేదీతో ముగుస్తుందని, ఈ అవకాశాన్ని ఉపయోగించుకుని సేవా పన్నును చెల్లించాలని అన్నారు. ఇంతకాలం సేవా పన్నును చెల్లించని వర్తకులు డిసెంబర్ 31వ తేదీలోగా చెల్లించాలన్నారు.

ఇటువంటి పథకాన్ని 1997లో అమలు చేశామని ఈ సందర్భంగా ఆయన గుర్తు చేశారు. సేవా రంగంలో దాదాపు 17 లక్షల మంది పన్ను చెల్లింపుదారులు పేర్లను నమోదు చేసుకున్నారని, కాని ఏడు లక్షల మంది మాత్రమే పన్నులను చెల్లిస్తున్నారని మరోమారు పునరుద్ఘాటించారు. మిగిలిన 10 లక్షల మంది సేవా పన్నును చెల్లించడం లేదని తెలిపారు. వీరిని నో ఫైలర్స్, స్టాప్ ఫైలర్స్‌గా పరిగణించనున్నట్లు చెప్పారు.

భారత జిడిపిలో సేవా రంగానికి 57 శతం వాటా ఉందని చిదరంబంర తెలిపారు. కాగా, పన్ను ఎగవేతదారులపై తమ శాఖ నిఘావేసి ఉందని, వారి కార్యకలాపాలను ఒక కంట కనిపెడుతూనే ఉంటామని పేర్కొన్నారు. విసిఈఎస్ స్కీమ్‌ను ఉపయోగించుకుంటే సరే, లేదంటే డిఫాల్టర్లపై చర్యలు కఠినంగా ఉంటాయని ఆయన హెచ్చరించారు. ఈ కార్యక్రమంలో కేంద్ర ఆర్థిక శాఖ సహాయ మంత్రి జెడి శీలం, ఇతర ఉన్నతాధికారులు పాల్గొన్నారు.