బుధవారం ఇండియన్ స్కూల్ ఆఫ్ బిజినెస్ (ఐఎస్‌బి)లో ఐదవ ‘ఐ దియా చాలెంజ్' కార్యక్రమంలో ఆయన పాల్గొని ప్రసంగించారు. వృద్ధిరేటు 7 శాతం స్థాయికి చేరితే విదేశీ ఇన్వెస్టర్లలో భారత్ పట్ల విశ్వాసం పెరుగుతుందని, దీంతో దేశంలో పెట్టుబడులు పెట్టడానికి వారు ముందుకు వస్తారని మాంటెక్ సింగ్ అహ్లువాలియా పేర్కొన్నారు. వర్తమాన ఆర్థిక సంవత్సరంలో బలమైన పునరుజ్జీవం ఉంటుందని తాను చెప్పలేనని, కాని ద్వితీయార్ధంలో ఇప్పటి కన్నా చాలా మెరుగైన స్థితిలో ఉంటామని మాత్రం గట్టిగా చెప్పగలనని ఆయన తెలిపారు.

రానున్న ఆరు మాసాల కాలంలో ఆర్థిక రంగం బలంగా పుంజుకుంటున్న సంకేతాలు స్పష్టంగా వెలువడతాయని ఆయన విశ్వసాన్ని వ్యక్తం చేశారు. అదే సమయంలో దేశంలో సార్వత్రిక ఎన్నికలు జరిగే అవకాశం ఉన్నందువల్ల వచ్చే ఏడాది మాత్రమే దాని ప్రభావం కనిపిస్తుందని ఆయన అభిప్రాయపడ్డారు. క్యాపిటల్ ఇన్ ఫ్లోస్ మినహా దేశంలోకి వచ్చి బయటకు ప్రవహించే విదేశీ మారకద్రవ్య విలువ వ్యత్యాసానికి సంబంధించిన కరెంట్ అకౌంట్ లోటు(సిఎడి) 2013-14 స్థూల జాతీయోత్పత్తిలో 2.5శాతం నుంచి 2.7 శాతం శ్రేణిలో ఉంటుందని మాంటెక్ పేర్కొన్నారు.

కేంద్రంలో అధికారంలోకి రాబోయే కొత్త ప్రభుత్వం చేపట్టే విధానాలు ఇచ్చే ఊతంతో వచ్చే ఆర్థిక సంవత్సరంలో ఆరు శాతం పైబడిన వృద్ధి సాధించగలమని భావిస్తున్నట్లు ఆయన తెలిపారు. మెరుగైన వృద్ధి సాధించాలంటే మౌలిక వసతులు మరింతగా అభివృద్ధి చేయాల్సి అవసరం ఉన్నదని అహ్లూవాలియా అన్నారు. జిడిపిలో ఎనిమిది శాతం మొత్తాన్ని మౌలిక వసతుల అభివృద్ధిపై ఖర్చు చేయగలిగినప్పుడే వృద్ధిరేటు జోరుగా ఉంటుందని తెలిపారు. కానీ ప్రస్తుతం మనం ఖర్చు చేస్తున్నది రెండు శాతమేనని ఆయన వివరించారు.