హెచ్ఈఆర్2+ మెటాస్టిక్ రోమ్ము క్యాన్సర్‌ నివారణ కోసం ఉపయోగించే ఈ ఔషధాన్ని అమెరికా ఔషధ కంపెనీ మైలాన్‌తో కలిసి సంయుక్తంగా అభివృద్ధి చేసినట్లు బయోకాన్ పేర్కొంది. 2009లోనే బయోకాన్, మైలాన్‌తో ఒప్పందం కుదుర్చుకున్న విషయం తెలిసిందే. ఔషధాన్ని క్యాన్ మాబ్ పేరుతో ఈ ఆర్థిక సంవత్సరం నాలుగో త్రైమాసికం నుంచి అందుబాటులోకి తేనున్నట్లు బయోకాన్ ఛైర్ పర్సన్ కిరణ్ మజుందార్ షా తెలిపారు.

డిసిజిఐ ఆమోద ముద్ర వేయడంతో బయోకాన్, మైలాన్ తమ ఔషధ ఉత్పత్తిని భిన్నమైన బ్రాండ్లలో మార్కెట్లలో విక్రయించనుంది. తమ ఉత్పత్తికి మార్కెట్లో భారీ డిమాండ్ ఉందని, ఇప్పటికే ఉన్న ఔషధాలతో పోల్చితే నూతనంగా వచ్చిన తమ ఔషధం సరైన ధరతో అమ్మకాలు జోరుగా కొనసాగుతాయని కిరణ్ మజుందార్ షా తెలిపారు. గత త్రైమాసికంలో సొరియాసిస్ చర్మ వ్యాధికి బయోకాన్ అల్జుమాబ్ పేరుతో ఓ ఔషధాన్ని తయారు చేసి మార్కెట్లోకి విడుదల చేసింది.

ఆంటీ బ్రెస్ట్ క్యాన్సర్ డ్రగ్ అమ్మకాల్లో భారత మార్కెట్ విలువ సుమారు రూ. 300 కోట్లుగా ఉంది. ఇప్పటికి ఈ మొత్తం అమ్మకాలను ఔషధ కంపెనీ రోషెకి చేపడుతోంది. కాగా 2012లో అంతర్జాతీయంగా ట్రాస్టుజుమాబ్ అమ్మకాలు 6.4 బిలియన్ డాలర్లు కాగా, దేశీయంగా 21 మిలియన్ డాలర్లుగా ఉంది. కెనడా తదితర దేశాల్లో మైలాన్ ఈ ఔషధాన్ని హెర్‌ట్రాజ్ పేరుతో విక్రయిస్తుంది.