దేశంలో మొత్తం 17లక్షల మంది సర్వీస్ టాక్స్ అసెసీలున్నారని, వారిలో ఏడు లక్షలమంది మాత్రమే క్రమం తప్పకుండా పన్నులు చెల్లిస్తున్నట్లు ప్రభుత్వ గణాంకాలు తెలుపుతున్నాయని ఆయన చెప్పారు. పన్ను బకాయిదారులంతా స్వచ్ఛందంగా పన్నులు చెల్లించాలనే వాలంటరీ కంప్లియెన్స్ ఎంకరేజ్‌మెంట్ స్కీమ్ (విసిఇఎస్)ను అందుబాటులోకి తీసుకొచ్చామని చిదంబరం తెలిపారు.

ఈ నేపథ్యంలోనే వివిధ వాణిజ్య, పరిశ్రమల సంఘాల ప్రతినిధులతో చిదంబరం సోమవారం సమావేశమయ్యారు. ఎవరినైతే ఉద్దేశించి విసిఇఎస్ స్కీమ్‌ను తీసుకొచ్చామో వారంతా దీన్ని సద్వినియోగం చేసుకోవాలని కోరారు. నిజానికి చాలామంది కొంతకాలం పన్నులు చెల్లించారన్న ఆయన ఆ తర్వాతే ఆపేశారని తెలిపారు. పన్ను ఎగవేతదారు అనే ముద్ర నుంచి బయటపడి వ్యాపారంలో కొత్త శకాన్ని ప్రారంభించేందుకు అవకాశం కల్పించడమే విసిఇఎస్ ప్రధాన లక్ష్యమని ఆయన అన్నారు.

భారత్ లో పెప్సికో పెట్టుబడులు: ఏడేళ్ళలో రూ. 33వేల కోట్లు

భారత్‌లో కార్యకలాపాల విస్తరణకు 2020 నాటికి పెప్సికో రూ. 33వేల కోట్ల (55 కోట్ల డాలర్లు) పెట్టబడులు పెట్టనున్నట్లు పెప్సికో ఛైర్ పర్సన్, సిఈఓ ఇంద్రా నూయి తెలిపారు. కొత్త ఉత్పత్తుల అభివృద్ధి, తయారీ, మౌలిక సదుపాయాలు, వ్యవసాయం తదితర రంగాల్లో కంపెనీ తన సామర్థ్యాలను ప్రస్తుత స్థాయి నుంచి రెట్టింపు చేసుకోవడానికి ఈ పెట్టుబడులు పెడుతున్నట్లు ఆమె చెప్పారు.

ఈ అమెరికా దిగ్గజ కంపెనీ 1989లో భారత్‌లో అడుగుపెట్టింది. భారత్‌లో రెండు రోజుల పర్యటన కోసం వచ్చిన నూయి, సోమవారం ఆర్థిక మంత్రి చిదంబరంతో భేటీ అయ్యారు. పెప్సీ కుర్రోళ్ల బ్రాండ్, కోకాకోలా వయసు మళ్లినవారికని ఇంద్రా నూయి తెలిపారు. భారత్‌లో ప్రత్యర్థికి భిన్నమైన వ్యాపార వ్యూహాన్ని ఆమె అనుసరిస్తున్నారు. థమ్సప్, స్థానిక బ్రాండ్‌లను కోకకోలా కొనుగోలు చేసింది. అయితే ఈ రెండు కంపెనీల మధ్య అనేక వ్యత్యాసాలున్నాయని, బ్రాండ్ ఈక్విటీ స్కోరును పరిశీలించినట్లయితే పెప్సీకి ఉన్న ఆదరణ తెలుస్తుందని ఆమె తెలిపారు.