ప్రస్తుత ఆర్థిక సంవత్సరం మొదటి త్రైమాసికంలో స్థూల దేశీయోత్పత్తి వృద్ధిని దృష్టిలో ఉంచుకుని వార్షిక వృద్ధిని కూడా కుదించినట్లు బ్యాంకు తన నివేదికలో తెలిపింది. అయితే 2014-15లో వృద్ధిరేటు 5.7శాతం ఉండవచ్చునని అంచనా వేసింది. ఇది కూడా గతంలో ప్రకటించిన అంచనా 6.5శాతం కన్నా తక్కువగానే ఉండడం గమనార్హం. ప్రస్తుత మార్కెట్‌లో నెలకొని ఉన్న అనిశ్చిత పరిస్థితులు ఆర్థిక సంస్కరణల ఆవశ్యకతను నొక్కి చెబుతున్నాయని ఎడిబి ముఖ్య ఆర్థిక వేత్త చాంగ్ యంగ్ రీ పేర్కొన్నారు.

కాగా గత నెలలో ప్రధాని ఆర్థిక సలహా మండలి(పిఎంఇఎసి) ప్రస్తుత ఆర్థిక సంవత్సరానికి భారత ఆర్థిక వృద్ధి రేటును 6.4 నుంచి 5.3శాతానికి తగ్గించింది. భారత ప్రభుత్వం వృద్ధిని రేటును పెంచేందుకు అనేక చర్యలు చేపబడుతోందని, ఇందులో భాగంగానే జపాన్‌తో ద్వైపాక్షిక వాణిజ్యాన్ని 1500 కోట్ల డాలర్ల నుంచి 5వేల కోట్ల డాలర్లకు పెంచాలని నిర్ణయం తీసుకున్నట్లు ఎడిబి తెలిపింది.

భారత్ స్థూల ఆర్థిక ప్రణాళికలను చిత్తశుద్ధితో అమలు చేయాల్సిన అవసరం ఉందని ఆసియా అభివృద్ధి బ్యాంకు అభిప్రాయపడింది. రూపాయి పతనం, విదేశీ నిధులు వెనక్కి మరలటం, వ్యవస్థాపరమైన ఇబ్బందులు భారత ఆర్థిక వ్యవస్థపై తీవ్ర ప్రభావం చూపుతున్నట్లు ఎడిబి తన నివేదికలో పేర్కొంది. భారత్ తోపాటు చైనా వృద్ధి రేటు అంచనాలను కూడా ఎడిబి తగ్గించింది. నిరుడు ఏప్రిల్‌లో 8.2శాతంగా ఉన్న చైనా వృద్ధి రేటును జులైలో 7.7శాతానికి తగ్గించింది. ప్రస్తుతం 7.6శాతానికి పరిమితం చేసింది.