ముంబై: ప్రస్తుతం భారత ఆర్థిక వ్యవస్థ సవాళ్లను ఎదుర్కుంటోందని నూతన రిజర్వు బ్యాంక్ గవర్నర్ రఘురాం రాజన్ అన్నారు. ఈనెల 20న ద్రవ్య విధానాన్ని ప్రకటిస్తామని ఆయన తెలిపారు. ద్రవ్య విలువ కాపాడాల్సిన అవసరం ఉందన్నారు.

భారత రిజర్వు బ్యాంక్ 23వ గవర్నరుగా రఘురాం గోవింద్ రాజన్ బుధవారం దువ్వూరి సుబ్బారావు నుంచి బాధ్యతలు స్వీకరించారు. ఐఎంఎఫ్, చికాగో విశ్వవిద్యాలయం లాంటి ప్రముఖ సంస్థల్లో పనిచేసిన రఘురాం రాజన్ గత ఏడాది కేంద్ర ఆర్థిక మంత్రిత్వ శాఖ ముఖ్య సలహాదారుగా నియమితులయ్యారు.

పేదరికాన్ని తగ్గించి విశాల దృక్పథంతో వేగవంతమైన వృద్ధిని సాధించేందుకు విధానాలను రూపొందించాల్సిన అవసరముందని ఆయన అన్నారు. ద్రవ్యోల్బణాన్ని స్థిరంగా ఉంచేందుకు చర్యలు తీసుకోవాల్సి ఉందని రాజన్ తెలిపారు. రూపాయి స్థిరత్వానికి తగు చర్యలు చేపట్టనున్నట్లు ఆయన చెప్పారు.

భవిష్యత్‌లో 10ఏళ్ల బాండ్లపై కూడా వడ్డీ రేటును ప్రవేశపెట్టనున్నట్లు తెలిపారు. ప్రభుత్వ సెక్యూరిటీస్‌లో బ్యాంకుల ఇన్వెస్ట్‌మెంట్లను తగ్గించేందుకు చర్యలు చేపట్టనున్నట్లు చెప్పారు. రూపాయి విలువ స్థిరత్వానికి చర్యలు చేపడుతున్నట్లు, మద్దతుగా ప్రవాస భారతీయుల నుంచి డిపాజిట్స్ మొబిలైజ్ చేస్తామన్నారు.