న్యూఢిల్లీ: విజయ్ మాల్యాకు చెందిన కింగ్ ఫిషర్ ఎయిర్ లైన్స్ తీరును ఆ కంపెనీకి చెందిన ఆడిటర్లే అనుమానిస్తున్నారు. రాబోయే కాలంలో కింగ్ ఫిషర్ ఎయిర్ లైన్స్ దివాలాకు అవకాశం లేని కంపెనీగా పరిగణించాలని కింగ్ ఫిషర్ కోరడంతో ఆడిటర్లు అభ్యంతరాలు వ్యక్తం చేశారు. ప్రస్తుతం కింగ్ ఫిషర్ ఎయిర్ లైన్స్ పీకల్లోతు నష్టాల్లో ఉండడం.. బ్యాంకుల వద్ద నుండి తీసుకున్న రుణాలు చెల్లించే విషయంలో విఫలమవుతున్న నేపథ్యంలో కంపెనీ ఈ విధంగా కోరడం సమంజసం కాదని ఆడిటర్లు తమ నివేదికలో తెలిపారు.

అంతేకాకుండా కంపెనీ పునరుద్దరణ ప్రణాళికలపై కంపెనీకి స్పష్టత లేదని నివేదికలో పేర్కొన్నారు. కింగ్ ఫిషర్ ఎయిర్ లైన్స్ మాతృసంస్ద యునైటెడ్ బ్రూవరీస్ (హోల్డింగ్స్) ఆడిటర్లు కూడా కింగ్ ఫిషర్‌లో యునైటెడ్ బ్రూవరీస్ భారీగా పెట్టుబడులు పెట్టడంపై ఆందోళన వ్యక్తం చేశారు. దాదాపు పది నెలలుగా కింగ్ ఫిషర్ ఎయిర్ లైన్స్ కార్యకలాపాలు నిలిచిపోయిన విషయం తెలిసిందే. దీనితోపాటు కింగ్ ఫిషర్ ఎయిర్ లైన్స్ ఫ్లైయింగ్ పర్మిట్ గడువు కూడా ముగిసింది. దీంతో ఆడిటర్లు తమ తాజా సమీక్ష నివేదికను కింగ్ ఫిషర్ ఎయిర్ లైన్స్ బోర్డుకు సమర్పించారు.

కింగ్ ఫిషర్ ఎయిర్ లైన్స్‌ను దివాలా తీయకుండా కంపెనీ కొనసాగడంపై తమ అనుమానాలను వ్యక్తం చేశారు. జూన్‌తో ముగిసిన త్రైమాసికంలో కింగ్ ఫిషర్ ఎయిర్ లైన్స్ రూ. 1,157 కోట్ల నష్టాలను మూటగట్టుకుంది. కింగ్‌ఫిషర్ ఎయిర్‌లైన్స్ ప్రస్తుతం రూ. 7000 కోట్లకుపైగా అప్పులు ఉన్నాయి. గతేడాది అక్టోబర్ 1న కంపెనీ ప్లయింగ్ లెసైన్స్‌ను కేంద్రం సస్పెండ్ చేయగా.. డిసెంబర్ 31తో లెసైన్స్ గడువు కూడా ముగిసింది. రుణ సంక్షోభంలో చిక్కుకున్న కింగ్‌ఫిషర్ ఎయిర్‌లైన్స్‌కు ఇచ్చిన రుణాలను వసూలు చేసేందుకు గాను నాలుగు ప్రధాన బ్యాంకులు కలిసి ఒక సబ్ గ్రూప్‌గా ఏర్పడ్డాయి. గతంలో కింగ్‌ఫిషర్ ఎయిర్‌లైన్స్‌కు స్టేట్ బ్యాంక్ ఆధ్వర్యంలో 17 బ్యాంకులు కింగ్‌ఫిషర్‌కు రూ.7,500 కోట్ల పైగా రుణాలు ఇచ్చిన విషయం తెలిసిందే. కంపెనీకి రుణాలిచ్చిన 17 బ్యాంకుల కన్సార్షియంలో భాగస్వామ్యులైన కీలక బ్యాంకుల నుంచి ఈ సబ్‌గ్రూప్ ఏర్పాటైంది. ఈ సబ్‌గ్రూప్‌లో స్టేట్‌బ్యాంక్ ఆఫ్ ఇండియా (ఎస్‌బీఐ), పీఎన్‌బీ, ఐడీబీఐ, బ్యాంక్ ఆఫ్ ఇండియా ఉన్నాయి.

వన్ఇండియా మనీ తెలుగు