హైదరాబాద్: డెక్కన్ క్రానికల్ హొల్డింగ్స్‌ లిమిటెడ్‌(డీసీహెచ్ఎల్)కు చెందిన డెక్కన్ క్రానికల్‌కు ఇచ్చిన రుణాలను వసూలు చేసుకునేందుకు గాను డీసీహెచ్‌ఎల్‌ తనఖా పెట్టిన ఆస్తులపై బ్యాంకులు దృష్టి సారించాయి. ఇందులో భాగంగా డీసీహెచ్‌ఎల్‌కు చెందిన డెక్కన్ క్రానికల్, ఆంధ్రభూమి, ఏషియన్ ఏజ్, ఫైనాన్షియల్ క్రానికల్ ట్రేడ్ మార్క్‌లను విక్రయించాలని ఐడీబీఐ బ్యాంక్ నిర్ణయించింది. ఈ ట్రేడ్ మార్కులను దక్కించుకోవడానికి ఆసక్తి ఉన్న సంస్దలు ఏవైనా తాము ఏర్పాటు చేయనున్న బిడ్డింగ్‌లో పాల్గోనవచ్చునని ఐడీబీఐ బ్యాంకు విడుదల చేసిన అధికారిక ప్రకటనలో పేర్కొంది. ఈ నాలుగు ట్రేడ్ మార్కులను తనఖా పెట్టుకోని 2011లో ఐడీబీఐ బ్యాంకు డెక్కన్ క్రానికల్ హొల్డింగ్స్‌ లిమిటెడ్‌(డీసీహెచ్ఎల్) రూ. 250 కోట్ల రుణాన్ని మంజూరు చేసింది.

తీసుకున్న రుణంతో పాటు ఇప్పుడు ఆ మొత్తం రూ. 297 కోట్లకు చేరింది. తీసుకున్న రుణాన్ని తిరిగి చెల్లించడంలో విఫలమైనందుకు ఈ ట్రేడ్ మార్కులను వేరే వారికి విక్రయించాలని ఐడీబీఐ బ్యాంకు నిర్ణయం తీసుకుంది. ఎవరైతే ఎక్కువ ధర ఆఫర్ చేస్తారో వారికి ఈ ట్రేడ్ మార్కులను విక్రయించనున్నట్లు బ్యాంకు అధికారులు పేర్కొన్నారు. దీనితో పాటు డెక్కన్ క్రానికల్ హొల్డింగ్స్‌ లిమిటెడ్‌(డీసీహెచ్ఎల్) తీసుకున్న రుణాన్ని తిరిగి చెల్లించడంలో విఫలమైనందుకు గాను ఆ సంస్దకు చెందిన నాలుగు ట్రేడ్ మార్కులను వేలం వేసేందుకు పరిమిషన్ ఇవ్వాల్సిందిగా ఐడీబీఐ బ్యాంకు ముంబై శాఖ రుణ వసూళ్ల ట్రిబ్యునల్ (డీఆర్‌టీ)ను ఆశ్రయించింది. ఈ మేరకు మంగళవారం డీఆర్‌టీలో పిటిషన్ దాఖలు చేసింది.

మీడియా సంస్ద డెక్కన్ క్రానికల్ హోల్డింగ్స్ అప్పులు మొత్తం సుమారు రూ. 3270 కోట్ల మేరకు ఉన్నట్లు తేలిందని సమాచారం. డెక్కన్ క్రానికల్ ప్రమోటర్లు ఐసీఐసీఐ బ్యాంక్‌కు రూ. 490 కోట్లు, యాక్సిస్ బ్యాంకు రూ. 400 కోట్లు, కెనరా బ్యాంక్ రూ 330 కోట్లు, ఆంధ్రా బ్యాంక్ రూ. 200 కోట్లు, యస్ బ్యాంక్ రూ. 175 కోట్లు, ప్యూచర్ క్యాపిటల్ హోల్టింగ్స్ కు రూ. 170 కోట్లలతో పాటు కార్పోరేషన్ బ్యాంక్, కోటాక్ మహేంద్ర బ్యాంక్, టాటా క్యాపిటల్, ఇండియా బుల్స్ మొదలగున వాటికి రూ. 100 కోట్లు వరకు బకాయిలు చెల్లించాల్సి ఉంది. వీటితో పాటు చిన్న చిన్న ఆర్దిక సంస్దలకు రూ. 70 నుండి రూ. 75 కోట్ల వరకు బకాయి పడింది.

డక్కన్ క్రానికల్ హోల్డింగ్స్‌కు హైదరాబాద్‌లోని శేరిలింగపల్లిలో ఉన్న ప్రింటింగ్ కార్యాలయాల్లో ఒకదానిని కోటక్ మహీంద్రా బ్యాంక్ సీజ్ చేసింది. ఇక వివరాల్లోకి వెళితే కోటక్ మహీంద్రా బ్యాంక్ గతంలో డక్కన్ క్రానికల్ హోల్డింగ్స్‌‌కు రుణం ఇచ్చింది. ఆ రుణాన్ని తిరిగి చెల్లించకపోవడంతో ఆ మొత్తం ఇప్పుడు రూ. 50.25 కోట్లకు పెరిగింది. తీసుకున్న రుణం చెల్లింపు విషయంలో విఫలమైనందుకు గాను డెక్కన్ క్రానికల్ ప్రింటింగ్ కార్యాలయానికి తాళం వేసిన విషయం తెలిసిందే.

వన్ఇండియా మనీ తెలుగు