న్యూఢిల్లీ: భారతీయ టెలికం రంగంలో ఎప్పటినుండో ఎదురుచూస్తున్న ఏకీకృత లెసైన్సు నిబంధనలను కేంద్రం ఎట్టకేలకు ప్రకటించారు. ఈ ఏకీకృత లెసైన్సు విధానం వల్ల కంపెనీలు ఏ టెక్నాలజీనైనా ఉపయోగించుకుని టెలికం సర్వీసులు అందించవచ్చు. అంతే కాకుండా ఇంట్రా సర్కిల్, ఇంటర్ సర్కిల్ రోమింగ్ సర్వీసులు కూడా కస్టమర్లకు అందించవచ్చు. ఐతే లెసైన్సు లేని సర్కిళ్లలో ఫోన్ కనెక్షన్లు ఇవ్వడానికి కుదరదని స్పష్టం చేసింది. కొత్త లైసెన్సు విధానంలో లెసైన్సును, స్పెక్ట్రంను విడివిడిగానే తీసుకోవాలి. టెలికం కంపెనీలన్నీ తమ పర్మిట్ల గడువు పూర్తయ్యాక కొత్త లెసైన్సింగ్ విధానానికి తప్పనిసరిగా మారాలని టెలికం శాఖ నిబంధనలను విడుదల చేసింది. ఈ కొత్త లైసెన్సులు ఇరవై సంవత్సరాల పాటు వర్తిస్తాయి. ఆ తర్వాత కావాలంటే మరో పది సంవత్సరాల పాటు పొడిగించుకోవచ్చు.

కొత్త నిబంధనల ప్రకారం టెలికం కంపెనీలు తమ కార్యకలాపాలు ఉన్న సర్కిళ్లలో మరో టెలికం కంపెనీలో నిర్ణయాత్మక వాటాలు కలిగి ఉండకూడదు. రిలయన్స్ కమ్యూనికేషన్స్, వొడాఫోన్‌పై ఈ నిబంధన ప్రభావం ఉండొచ్చని అంచనా. రిలయన్స్ కమ్యూనికేషన్స్‌కి రిలయన్స్ టెలికంలో 9.9 శాతం వాటాలు ఉండగా.. ఆరు సర్కిళ్లలో ఈ రెండూ కూడా సర్వీసులు అందిస్తున్నాయి. అటు భారతీ ఎయిర్‌టెల్‌లో వొడాఫోన్‌లో వాటాలు ఉన్నాయి. గత లెసైన్సింగ్ విధానం బట్టి చూస్తే ఈ స్థాయి వాటాలు పరిమితులకు లోబడే ఉన్నాయని సమాచారం.

ఏకీకృత లెసైన్సు తీసుకునే ఆపరేటర్లు గరిష్టంగా అన్ని సర్వీసులు అందించేందుకు రూ. 15 కోట్ల దాకా చెల్లించాల్సి ఉంటుంది. కేవలం కొన్ని సర్వీసులను మాత్రమే అందించే కంపెనీలు వన్‌టైమ్ ఎంట్రీ ఫీజు కట్టాలి.

వన్ఇండియా మనీ తెలుగు