ముంబై: ఆటోమెటెడ్ టెల్లర్ మిషన్ (ఏటీఎం) సేవలు మరింతగా మెరుగుపరచే దిశగా రిజర్వ్ బ్యాంక్ ఆఫ్ ఇండియా (ఆర్‌బీఐ) చర్యలు చేపట్టింది. ఇందులో భాగంగానే ఏటీఎంలలో డబ్బు లేని పక్షంలో ఆ విషయాన్ని లావాదేవీలు జరపడానికి వచ్చిన కస్టమర్లకు ముందుగానే తెలియజేసే విధంగా చర్యలు తీసుకోవాలని ఆర్‌బీఐ అన్ని బ్యాంకులకు సూచించింది. కస్టమర్లు ఏటీఎంలలో లావాదేవీలు జరపడానికి వచ్చినప్పుడు డబ్బు లేని విషయాన్ని స్క్రీన్‌పై నోటీసు రూపంలోనైనా డిస్‌ప్లే చేయాలని ఆదేశించింది.

దీనితో పాటు డబ్బు లేని సందర్బంలో ఫిర్యాదు ఫారాలు, ఎవరికి ఫిర్యాదు చేయవచ్చో వారి పేర్లు, ఫోన్ నంబర్లు, ఏటీఎం ఐడీ మొదలైనవి ఏటీఎం కేంద్రంలో కచ్చితంగా ఉంచాలని సూచించింది. వీటితో పాటు టోల్ ఫ్రీ నంబర్లను కూడా ప్రముఖంగా కనిపించేలా ప్రదర్శించాలని ఆర్‌బీఐ ఆదేశించింది. ఇక, మోసపూరిత విత్‌డ్రాయల్స్‌ని అరికట్టే దిశగా.. లావాదేవీలు జరిపేటప్పుడు ప్రతి దశలోనూ.. నిర్ణీత సమయంలో స్క్రీన్ మారిపోయేలా ఏటీఎం మెషీన్‌లో ఏర్పాట్లు చేయాలని పేర్కొంది. మోసాలను అరికట్టేందుకు ఎలక్ట్రానిక్ బ్యాంకింగ్ సాధనాలపై ఖాతాదారుల్లో అవగాహన పెంచాలని సూచించింది.

ఇటీవల కాలంలో రూపాయి మారకపు విలువ తగ్గడంతో దానికి అడ్డుకట్ట వేసేందుకు రిజర్వ్ బ్యాంక్ ఆఫ్ ఇండియా (ఆర్‌బీఐ) మరిన్ని చర్యలు ప్రకటించింది. ఇందులో భాగంగా విదేశీ సంస్థాగత ఇన్వెస్టర్లు (ఎఫ్‌ఐఐ) కచ్చితంగా అవసరమైతేనే హెడ్జింగ్ చేసేలా నిబంధనలు కఠినతరం చేసింది.

వన్ఇండియా మనీ తెలుగు