ముంబై: ఈరోజు జరిగిన రిజర్వ్ బ్యాంక్ ఆఫ్ ఇండియా (ఆర్‌బీఐ) ద్రవ్యపరపతి విధాన సమీక్షలో ఆర్‌బీఐ గవర్నర్ దువ్వూరి సుబ్బారావు మాట్లాడుతూ ఈ ఆర్దిక సంవత్సరం వృద్ది రేటు అంచనాను 5.7 నుండి 5.5 శాతానికి తగ్గించినట్లు చెప్పారు. కీలక వడ్డీ రేట్లు యదాతథంగా ఉంటాయని పేర్కొన్నారు. కరెంట్ ఖాతా లోటు నియంత్రణకు రిజర్వ్ బ్యాంక్ ఆఫ్ ఇండియా (ఆర్‌బీఐ) చర్యలు చేపట్టినట్లు చెప్పారు. ఇటీవల కాలంలో రూపాయి మారకపు విలువ ఒడిదుడుకులను నివారించడమే తమ ప్రధాన లక్ష్యమని ఆర్‌బీఐ స్పష్టం చేసింది. రూపాయి క్షీణిస్తున్న సందర్బంలో ద్రవ్యోల్బణం కట్టడి, లిక్విడిటీ నిర్వహణే తమ ముందున్న ప్రధాన అంశమని దువ్వూరి పేర్కొన్నారు.

మంగళవారం మొదటి త్రైమాసిక ద్రవ్య, పరపతి విధాన సమీక్ష నేపథ్యంలో ఆర్‌బీఐ సోమవారం స్థూల ఆర్థిక వ్యవస్థ, పరపతి పరిణామాలపై తన నివేదికను విడుదల చేసింది. సెప్టెంబర్ 4న ఆర్‌బీఐ గవర్నర్‌గా దువ్వూరి సుబ్బారావు బాధ్యతల నుంచి వైదొలగనున్న నేపథ్యంలో-ఆయన నేతృత్వంలో జరుగుతున్న చివరి ద్రవ్యపరపతి విధాన సమీక్ష ఇది. రూపాయి ఒడిదుడుకులకు ప్రధాన కారణం కరెంట్ అకౌంట్ లోటు.. దీనిని కట్టడి చేసేందుకు కఠిన చర్యలు అవసరం అని అన్నారు. ఐతే రూపాయి ఒడిదుడుకుల నివారణకు ఆర్‌బీఐ తీసుకున్న నిర్ణయాలు కొంత ఉపశమనాన్ని కలిగించవచ్చునని అన్నారు.

గతేడాది 4.8 శాతం క్యాడ్‌తో పోల్చితే 2013-14లో ఈ రేటు తగ్గే అవకాశం ఉన్నప్పటికీ, ఏప్రిల్ క్యాడ్ పరిమాణం (3.8 శాతం)తో పోల్చితే ప్రస్తుత జూన్ క్వార్టర్‌లో పెరిగే పరిస్థితులు ఉన్నాయి. ఇక వృద్ది రేటు విషయానికి వస్తే స్థూల ఆర్థిక పరిస్థితులు అందుకు దోహదపడుతున్నాయి. వృద్దిరేటు, ద్రవ్యోల్బణం ప్రాతిపదికనే కాకుండా, అంతర్జాతీయంగా నెలకొన్న పరిణామాలు, సవాళ్ల ప్రాతిపదికన సైతం ద్రవ్య పరపతి విధానం ఆధారపడి ఉంటుంది. టోకు ధరల సూచీ (డబ్ల్యూపీఐ) ఆధారిత ద్రవ్యోల్బణం తగ్గినప్పటికీ, వినియోగ ధరల ఆధారిత రిటైల్ ద్రవ్యోల్బణం గడచిన 15 నెలల నుంచీ రెండంకెల స్థాయి వద్దే కొనసాగుతుండటం సంతోషించాల్సిన విషయం.

వన్ఇండియా మనీ తెలుగు