బెంగుళూరు: దేశయ ఐటీ దిగ్గజం విప్రో 2013-14వ తొలి ఆర్దిక సంవత్సరంలో మెరుగైన ఫలితాలను ప్రకటించింది. కన్సాలిడేటెడ్ ప్రాతిపదికన విప్రో నికరలాభం 11 శాతం వృద్ది చెంది రూ. 1,623 కోట్లకు చేరింది. గత ఏడాది ఇదే త్ర్రైమాసికంలో రూ. 1,466 కోట్లను మాత్రమే ఆర్జించింది. మెరుగైన లాభాలను ప్రకటించడానికి గల కారణం ఐటీయేతర బిజినెస్‌లను ప్రత్యేక కంపెనీగా విడదీయడం ఒకటి కాగా.. రెండోది భారీ కాంట్రాక్ట్‌లను పొందడంతోపాటు, ఔట్‌సోర్సింగ్ సేవలకు డిమాండ్ పుంజుకోవడమేనని కంపెనీ పేర్కొంది.

ఇక Q1లో కంపెనీ అమ్మకాలు మొత్తం 5 శాతం పెరిగి రూ. 9,733 కోట్లను ఆర్జించింది. జూన్ నుండి అమల్లోకి వచ్చే విధంగా ఉద్యోగులకు జీతాలను పెంచినట్లు విప్రో కంపెనీ సీఎఫ్‌వో సేనాపతి తెలిపారు. ఆఫ్‌షోర్ ఉద్యోగులకు సగటున 6-8% పెంపును అమలు చేయగా, ఆన్‌సైట్ సిబ్బందికి 2-3% స్థాయిలో జీతాలను పెంచినట్లు వెల్లడించారు. ఇక ఈ ఏడాదికి విప్రో 165 కోట్ల డాలర్ల ఆదాయాన్ని సాధించగలమని అంచనా వేసింది. ఇది ఇలా ఉంటే విప్రోతో పోలిస్తే టాటా కన్సల్టెన్సీ సర్వీసెస్, ఇన్పోసిస్ మెరుగైన ఫలితాలను ప్రకటించిన విషయం తెలిసిందే.

Q1 ముఖ్యాంశాలు:

ఐటీ ఉత్పత్తుల ఆదాయం సంవత్సర ప్రాతిపదికన 15% తగ్గి రూ. 817 కోట్లకు పరిమితమైంది.
ఐటీ సర్వీసుల విభాగంలో 1,469 మందిని కొత్తగా నియమించుకోవడంతో మొత్తం సిబ్బంది సంఖ్య 1,47,281కు చేరింది.

వన్ఇండియా మనీ తెలుగు