న్యూఢిల్లీ: ఉద్యోగార్దులు వేతనం కన్నా చేసే పని, మంచి కంపెనీలో ఉద్యోగం లాంటి విషయాలకే ప్రాధాన్యం ఇస్తున్నట్లు క్యాంపస్ నియామకాలకు పేరుపడ్డ ఫస్ట్ నౌకరీడాట్ కామ్ నిర్వహించిన సర్వేలో తేలింది. క్యాంపస్ హైరింగ్ కార్యకలాపాలు నిర్వహించే ఈ సంస్ద తమ పోర్టల్‌లో నమోదు చేసుకుోన్న ఉద్యోగార్దులతో ఈ మెయిల్ ద్వారా ఈ సర్వే నిర్వహించినట్లు తెలియజేసింది. ఈ సర్వేలో బీఈ, బీటెక్ ఐటీ అభ్యర్దులు ఉద్యోగం చేయడానికి ఇష్టపడ్డ కంపెనీల్లో ఐబీఎం మొదటి స్దానంలో నిలిచిందని ఫస్ట్‌నౌకరీ డాట్‌కామ్ హెడ్ దీపాలీ సింగ్ చెప్పారు. ఆ తర్వాతి స్దానాల్లో టీసీఎస్, ఇన్ఫోసిస్‌లు నిలిచాయన్నారు.

ఐటీ కాకుండా ఇతర విభాగాల ఇంజనీర్లు తొలుత రక్షణ పరిశోధన, అభివృద్ది సంస్ద (డీఆర్డీవో)ని గాని, లేకపోతే ఎల్ అండ్ టీని గాని ఎంచుకుంటున్నారు. ఆ తర్వాతి స్దానాల్లో టాటా మోటార్స్ లేదా టాటా స్టీల్ లో ఉద్యోగం కోసం చూస్తున్నట్లు సర్వే నివేదికలో పేర్కొంది. ఇక ఎంబీఏ, ఎంసీఏ విద్యార్థులకు కోక్-కోలా, భారతీ ఎయిర్‌టెల్‌లు ఫేవరేట్‌లుగా నిలవగా, తర్వాతి స్థానాల్లో పెప్సీ, శామ్‌సంగ్ ఉన్నాయి. ప్రపంచ వ్యాప్తంగా ఐటీ మేనేజర్, నెట్ వర్క్ అడ్మినిస్ట్రేటర్, ఇంజనీర్, అకౌంటెంట్, సాప్ట్ వేర్ డెవలపర్ వంటి ఉద్యోగాలు భర్తీ చేయడం కంపెనీలకు కష్టతరంగా మారుతుందని సర్వేలో తేలింది.

సర్వే ముఖ్యాంశాలు:

* భద్రతా సిబ్బందిని నియమించుకోవడానికి అమెరికా, రష్యాలు ఎక్కువ కష్టాలను ఎదుర్కొంటున్నాయి.
* నిర్మాణ కార్మికుడు, ట్రేడ్ పర్సన్ నియామకాలు జపాన్‌కు కష్టమవుతున్నాయి.
* అర్హులైన అభ్యర్దులు దొరకకపోవడంతో గిరాకీ ఉన్న ఉద్యోగాలను భర్తీ చేయడంలో ప్రపంచ వ్యాప్తంగా చాలా కంపెనీలు సమస్యలను ఎదుర్కొంటున్నాయి.
* భారత్‌లో ఐటీ మేనేజర్, నెట్ వర్క్ అడ్మినిస్ట్రేటర్, ఇంజనీర్, అకౌంటెంట్, సాప్ట్ వేర్ డెవలపర్ వంటి ఉద్యోగాల భర్తీకి చాలా సమయం పడుతుంది.