లండన్: దేశీయ ఐటీ దిగ్గజం విప్రో ఛైర్మన్ అజీమ్ ప్రేమ్‌ జీకి ఈ సంవత్సరం ఏషియన్ బిజినెస్ లీడర్ అవార్డు లభించింది. లండన్ ప్రధాన కేంద్రంగా కార్యకలాపాలు నిర్వహిస్తున్న ఏషియా హౌస్ ఈ అవార్డును అందిస్తుంది. అజీమ్ ప్రేమ్‌ జీ చేసిన వ్యాపార కృషి మరియు సమాజ సేవ ఇతరులకు స్పూర్తిదాయకంగా నిలుస్తుండడంతో.. ఆయన చేసిన మంచి పనులకు గుర్తింపుగా ఈ అవార్డుని ఇచ్చి సత్కరిస్తున్నామని ఏషియా హౌస్ పేర్కొంది. అజీమ్ ప్రేమ్‌‌జీకి ఈ అవార్డుని అక్టోబర్ 14న జరిగే కార్యక్రమంలో ప్రదానం చేయనున్నారు.

మన దేశంలో ఐటీ కంపెనీల్లో ఒకటైన విప్రో కంపెనీకి ఛైర్మన్‌గా ఉన్న అజీమ్ ప్రేమ్‌‌ జీ వివిధ ధార్మిక కార్యక్రమాలకు విరివిగా విరాళాలు ఇస్తున్న విషయం తెలిసిందే. ఒకానోక సందర్బంలో అజీమ్ ప్రేమ్‌జీ తన సంపదలో ఎక్కువ భాగం దానధర్మాలకే వినియోగిస్తానని చెప్పారు. 2010వ సంవత్సరంలో విప్రోలో తనకున్న వ్యక్తిగత వాటా నుంచి 8.7 శాతం స్టాక్స్‌ను అజీమ్ ప్రేమ్‌జీ ఫౌండేషన్‌కు దానంగా ఇచ్చిన సంగతి తెలిసిందే. దేశంలో ప్రాథమిక విద్యా వ్యవస్థను మెరుగుపరచడం, నాణ్యతను పెంచడానికి ఏర్పాటు చేసిన ఈ ఫౌండేషన్‌కు ప్రేమ్‌జీ చైర్మన్‌గా వ్యవహరిస్తున్నారు. తన ఏర్పాటు చేసిన ఫౌండేషన్‌లో ప్రస్తుతం 800 మంది వెనుకబడిన వారికి చేయూతనిస్తుందని.. అలాగే అజీమ్‌ ప్రేమ్‌జీ విశ్వవిద్యాలయంలో వచ్చే ఐదేళ్లలో 4000-5000 స్థాయికి పెంచేందుకు ఫౌండేషన్ ప్రణాళికలు రూపొం దిస్తోందని అజీమ్ ప్రేమ్‌జీ చెప్పారు.

గత రెండు సంవత్సరాల నుంచి ఫౌండేషన్‌ చేస్తున్న పనులు తనను సంతృప్తి చెందానన్నారు. సమాజంలో బాగా డబ్బున్న వారు దేశంలో కోట్లాది మంది ప్రజలు కనీస అవసరాలకు కూడా నోచుకోకుండా ఉన్న వారిని ఆదుకోవాలని గట్టిగా నమ్ముతున్నానని ఆయన అన్నారు. తాను ఆదశగానే పయనిస్తానని చెప్పారు. ప్రేమ్‌జీ తనపై గాంధీజీ ప్రభావం చాలా గాఢంగా ఉందని చెప్పారు. టాటా గ్రూప్ ఛైర్మన్ రతన్ టాటాకు గతంలో ఈ అవార్డు లభించింది. ఇక ఏషియా హౌస్ విషయానికి వస్తే వాణిజ్యం, సంస్కృతి, విధానాలపరంగా ఆసియా దేశాలను, ఇంగ్లాండ్‌ను చేరువ చేసేందుకు తోడ్పడుతుంది.

వన్ఇండియా మనీ తెలుగు