ముంబై: ఇటీవల కాలంలో రూపాయి క్షీణతను అడ్డుకోవడానికి ద్రవ్య లభ్యతను తగ్గించే చర్యలను రిజర్వ్ బ్యాంక్ ఆఫ్ ఇండియా (ఆర్‌బీఐ) ప్రకటించినప్పటికీ.. బ్యాంకులు మాత్రం వడ్డీ రేట్లను పెంచవని బ్యాంకర్లు పేర్కొన్నారు. రుణాల రేట్లను పెంచే యోచన లేదని ప్రభుత్వ రంగ బ్యాంక్ స్టేట్ బ్యాంక్ ఆఫ్ ఇండియా (ఎస్‌బీఐ) స్పష్టం చేసింది. ఇది ఇలా ఉంటే రూపాయి ఒడుదొడుకులను అడ్డుకునేందుకు రిజర్వ్ బ్యాంక్ ఈ చర్యలు తీసుకుందని బ్యాంక్ ఆఫ్ బరోడా సీఎండీ ఎస్ ఎస్ ముంద్రా అన్నారు. ఈ చర్యల వల్ల ఉత్పాదక రంగాలకు నిధుల కొరతరాదని పేర్కొన్నారు.

రిజర్వ్ బ్యాంక్ చేపట్టిన ఈ చర్యలు, ఇటీవల తగ్గించిన బేస్ రేటును మళ్లీ పెంచే యోచన లేదని బ్యాంక్ ఆఫ్ ఇండియా సీఎండీ విఆర్ అయ్యర్ తెలిపారు. రూపాయి మారకపు విలువని బలోపేతం చేయడానికి బ్యాంకులకు ఇచ్చే రుణాలపై వడ్డీరేటును రిజర్వ్ బ్యాంక్ 2 శాతానికి పెంచింది. ఇది ఇలా ఉంటే ద్రవ్య లభ్యత సర్దుబాటు సౌకర్యంపై రిజర్వ్ బ్యాంక్ ఆఫ్ ఇండియా పరిమితిని విధించింది. ఇందులో భాగంగా బ్యాంకులు తన వద్ద తీసుకునే రుణాలపై వడ్డీ రేటుని పెంచడంతో పాటు, దేశంలో ఓపెన్ మార్కెట్ లావాదేవీల ద్వారా రూ. 12,000 కోట్ల మేర బాండ్లను విక్రయించనున్నట్లు ఆర్‌బీఐ ప్రకటించింది.

ఇది ఇలా ఉంటే ఢిల్లీలో వెంచర్ క్యాపిటలిస్ట్‌లు, ప్రైవేటు ఈక్విటీ ఫండ్ ప్రతినిధులనుద్దేశించి ఆర్దిక మంత్రి చిదంబరం మాట్లాడుతూ డాలర్‌తో రూపాయి మారకపు విలువలో భారీ హెచ్చుతగ్గులను నివారించేందుకు వీలుగా రిజర్వ్ బ్యాంక్ ఆఫ్ ఇండియా (ఆర్‌బీఐ) చేపట్టిన వల్ల బ్యాంకులు రుణాలపై వడ్డీ రేట్లను పెంచకపోవచ్చని అన్నారు. కరెంట్ అకౌంట్ లోటు, ద్రవ్యోల్బణానికి కళ్లెం వేసేందుకు కూడా ఆర్‌బీఐ చర్యలు దోహదం చేస్తాయన్నారు.

వన్ఇండియా మనీ తెలుగు