హైదరాబాద్: రుణాలపై వడ్డీరేట్లను పావు శాతం తగ్గిస్తూ ఆంధ్రా బ్యాంక్ సోమవారం తీసుకున్న నిర్ణయాన్ని వెనక్కి తీసుకుంది. ఇటీవల కాలంలో పతనమవుతున్న రూపాయి విలువని అరికట్టడానికి రిజర్వ్ బ్యాంక్ ఆఫ్ ఇండియా (ఆర్‌బీఐ) తీసుకుంటున్న చర్యల కారణంగా బేస్ రేటుని తగ్గించాలన్న నిర్ణయాన్ని వెనక్కి తీసుకున్నట్లు ఆంధ్రా బ్యాంక్ ప్రకటనలో పేర్కొంది. అంతర్జాతీయంగా పతనమవుతున్న రూపాయి ఒడిదుడుకులను అరికట్టడానికి ఆర్‌బీఐ తీసుకుంటున్న చర్యలు అతి తక్కువ కాలంలో రూపాయిపై అనుకూల ప్రభావం చూపగలవన్న నమ్మకాన్ని ఆంధ్రా బ్యాంక్ వ్యక్తం చేసింది. ఆంధ్రాబ్యాంక్ బేస్ రేటును 10.25 శాతం నుండి 10 శాతానికి తగ్గించిన విషయం తెలిసిందే.

ఈ బేస్ రేట్ తగ్గింపు జులై 22 నుండి అమల్లోకి రావాల్సి ఉంది. ఐతే తాజా నిర్ణయంతో బేస్ రేటులో ఎలాంటి మార్పు లేకుండా 10.25 శాతంగా ఉండనుంది. ఇది ఇలా ఉంటే రూపాయి మారకంలో భారీ హెచ్చు తగ్గులను నియంత్రించేందుకు రిజర్వ్ బ్యాంక్ ఆఫ్ ఇండియా (ఆర్‌బీఐ) తీసుకున్న చర్యలతో రూపాయికి కాస్త ఊరట లభించింది. . లిక్విడిటీని కట్టడి చేయడం ద్వారా రూపాయి హెచ్చుతగ్గులను నియంత్రించేందుకు ఆర్‌బీఐ చర్యలు ప్రకటించిన సంగతి తెలిసిందే.

ఇందులో భాగంగా బ్యాంకులు తన వద్ద తీసుకునే రుణాలపై వడ్డీ రేటుని పెంచడంతో పాటు, దేశంలో ఓపెన్ మార్కెట్ లావాదేవీల ద్వారా రూ. 12,000 కోట్ల మేర బాండ్లను విక్రయించనున్నట్లు ఆర్‌బీఐ ప్రకటించింది. జూలై 8న ఆల్‌టైం కనిష్టమైన 61.21కి పడిపోయిన రూపాయికి ఈ చర్యలు కాస్త ఊతమివ్వగలవని విశ్లేషకులు భావిస్తున్నారు.

వన్ఇండియా మనీ తెలుగు