న్యూఢిల్లీ: కొత్త జాయింట్ వెంచర్ టెలివింగ్స్ కమ్యూనికేషన్స్‌లో రూ. 1,000 కోట్ల పెట్టుబడులు పెట్టడానికి నార్వే కంపెనీ టెలినార్ చేసిన ప్రతిపాదనకు కేంద్ర ప్రభుత్వం ఆమోద ముద్ర వేసింది. విదేశీ పెట్టుబడుల ప్రోత్సాహక బోర్డు (ఎఫ్‌ఐపీబీ) సిఫారసు మేరకు ఈ నిర్ణయం తీసుకుంది. టెలివింగ్స్‌లో వాటాను 49 శాతం నుండి 74 శాతానికి పెంచుకోవడానికి విదేశీ పెట్టుబడుల ప్రోత్సాహక బోర్డుకి దరఖాస్తు చేసినట్లు టెలినార్ మొబైల్ కమ్యూనికేషన్స్ ఏఎస్ తెలిపింది.

యూనినార్ బ్రాండ్‌తో దేశంలో 6 సర్కిళ్లలో టెలినార్ టెలికం సేవలందిస్తున్న విషయం తెలిసిందే. ఈ 6 సర్కిళ్లు మహారాష్ట్ర, గుజరాత్, ఉత్తర ప్రదేశ్ ఉత్తరం, ఉత్తర ప్రదేశ్ పడమర, బీహార్ (జార్ఖండ్ తో కలిపి) మరియు ఆంధ్రప్రదేశ్‌లో తన సర్వీసులను అందిస్తుంది. యూనినార్ వ్యాపారాన్ని కొత్త జాయింట్ వెంచర్‌కు బదిలీ చేసే ప్రక్రియలో టెలినార్ ఉంది. టెలివింగ్స్‌ను ఏర్పాటు చేయడానికి లక్ష్య ద్వీప్ ఇన్వెస్ట్ మెంట్ అండ్ ఫైనాన్స్‌తో ఒప్పందం కుదుర్చుకుంది.

ఇటీవలే టెలినార్ ప్రతిపాదన సహా రూ. 1,311.54 కోట్ల విలువైన ఎనిమిది ప్రత్యక్ష పెట్టుబడుల ప్రతిపాదనలకు కేంద్ర ప్రభుత్వం తన అనుమతినిచ్చింది. జూన్ 14న జరిగిన సమావేశంలో పైన పేర్కొన్న ప్రతిపాదనకు విదేశీ పెట్టుబడుల ప్రోత్సాహక బోర్డు ఓకే తెలిపడంతో కేంద్ర ప్రభుత్వం కూడా తన ఆమోదాన్ని తెలిపింది.

వన్ఇండియా మనీ తెలుగు