న్యూఢిల్లీ: పీఎస్‌బీ చీఫ్‌లతో జరిగిన సమావేశం అనంతరం విలేకరులతో ఆర్దిక మంత్రి పి. చిదంబరం మాట్లాడుతూ రుణాలపై వడ్డీ రేట్లను తగ్గించాలని ప్రభుత్వ రంగ బ్యాంకుల (పీఎస్‌బీ)ను కోరారు. ఇటీవల కాలంలో రిజర్వ్ బ్యాంక్ ఆఫ్ ఇండియా (ఆర్‌బీఐ) పాలసీ రేట్లను తగ్గించినప్పటికీ.. బ్యాంకులు మాత్రం తమ ఖాతాదారులకు బదిలీ చేయడంలో వెనకాడుతున్న విషయం తెలిసిందే. ఐతే ఇలాంటి సందర్బంలో చిదంబరం మాటలు ప్రాధాన్యతను సంతరించుకున్నాయి. గత ఏడాది జనవరి నుండి ఆర్‌బీఐ రెపో రేటును 1.25 శాతానికి తగ్గించింది. ఐతే బ్యాంకులు మాత్రం ఇందులో 0.3 శాతం ప్రయోజనాన్ని రుణ గ్రహీతలకు అందించాయి. ఇది ఇలా ఉంటే బ్యాంకులు తమ బేస్ రేటును ఈ నెలలో సమీక్షించనున్నట్లు చిదంబరం చెప్పారు.

దీంతో రేట్ల తగ్గింపుపై తగిన నిర్ణయం తీసుకుంటామన్నారు. ఇక బ్యాంకుల నుండి రుణాలు పొందిన తర్వాత కావాలనే రుణాలను ఎగ్గొట్టేవాళ్లను ఎట్టిపరిస్థితుల్లోనూ వదలొద్దని, బకాయిల వసూళ్లకు కఠిన చర్యలు చేపట్టాలని బ్యాంకర్లకు చిదంబరం సూచించారు. అదేవిధంగా రుణాలు చెల్లించకుండా డిఫాల్ట్ అయిన బడా కస్టమర్లపై దృష్టి పెట్టాలన్నారు. డిసెంబర్ క్వార్టర్‌తో పోలిస్తే.. మార్చితో ముగిసిన మూడు నెలల్లో బ్యాంకుల ఎన్‌పీఏలు కాస్త మెరుగుపడ్డాయని చెప్పారు. అయితే ఒక్క క్వార్టర్‌నే పరిగణనలోకి తీసుకోకూడదని, పూర్తి ఏడాదికి ఎన్‌పీఏల పరిస్థితినిబట్టి ఒక అంచనాకు వచ్చేందుకు వీలవుతుందన్నారు.

గత ఆర్థిక సంవత్సరం(2012-13)లో బ్యాంకుల డిపాజిట్ల సమీకరణ స్వల్పంగానే వృద్ధి చెందిందని... రుణాల వృద్ధి మాత్రం 15.62 శాతానికి తగ్గిపోయినట్లు చిదంబరం చెప్పారు. ఇక కొత్త బ్యాంకింగ్ లెసైన్స్‌ల జారీ విషయంలో ప్రభుత్వం జోక్యం చేసుకోబోదని, ప్రభుత్వం తరుపునుండి ఎలాంటి సిఫార్సులు ఉండవని చిదంబరం స్పష్టం చేశారు. దరఖాస్తు చేసిన సంస్థలకు ఆర్‌బీఐ మార్గదర్శకాలకు అనుగుణంగా అర్హతలన్నీ ఉంటేనే లెసైన్స్‌లు దక్కుతాయని అన్నారు.