న్యూఢిల్లీ: భారత టెలికం రంగంలో ప్రస్తుతం 74 శాతంగా ఉన్న విదేశీ ప్రత్యక్ష పెట్టుబడులు (ఎఫ్‌డీఐ) పరిమితిన 100 శాతానికి పెంచేందుకు గాను టెలికం కమిషన్ ఆమోద ముద్ర వేసింది. దీనికి త్వరలో కెబినెట్ కూడా ఆమోద ముద్ర వేయనుంది. ఏదైనా ఒక సంస్థలో 49 శాతం వరకూ విదేశీ పెట్టుబడులను ఎటువంటి అనుమతులు లేకుండా అంగీకరించవచ్చు. ఆ తర్వాత వచ్చే పెట్టుబడులకు మాత్రం విదేశీ పెట్టుబడులు, ప్రోత్సాహక బోర్డు (ఎఫ్‌ఐపీబీ) అనుమతిని పొందాల్సి ఉంటుంది.

టెలికం కమీషన్ తీసుకున్న ఈ నిర్ణయానికి కెబినెట్ ఆమోద ముద్ర పడితే తక్షణమే ఇది అమల్లోకి వస్తుందని సీనియర్ ప్రభుత్వం అధికారి ఒకరు తెలిపారు. ఈ విషయంపై పూర్తి వివరాలతో కూడిన నివేదికను టెలికం శాఖ ఎఫ్‌ఐపీబీకి పంపిస్తుందని తెలిపారు. తర్వాత ఈ నివేదికపై టెలికం కమిషన్ అభిప్రాయాలను ఎఫ్‌ఐపీబీ సేకరిస్తుందని చెప్పారు. తదుపరి కేబినెట్ ముందుకు నివేదిక వెళుతుందని సీనియర్ అధికారి వెల్లడించారు.

ఇది ఇలా ఉంటే ఆర్దిక మంత్రి పి.చిదంబరంను వొడాఫోన్ ఇండియా ఛైర్మన్ అనల్ జిత్ జింగ్ కలిశారు. పన్ను వివాదాన్ని త్వరగా పరిష్కరించాలని కోరారు. పన్ను వివాద పరిష్కారానికి ప్రత్యామ్నాయ మార్గాన్ని అనుసరించేందుకు ప్రభుత్వం సుముఖత చూపడంతో చిదంబరంతో సింగ్ భేటీ అయ్యారు. హాచ్ సన్ ఎస్సార్‌లో హచ్ వాటా కొనుగోలుకు సంబంధించి రూ. 8400 కోట్ల పన్ను చెల్లించాలని ప్రభుత్వం డిమాండ్ చేస్తుండగా.. రూ. 3900 కోట్లు చెల్లించడానికి వొడాఫోన్ ఇండియా ముందుకు వచ్చిందని సమాచారం.

వన్ఇండియా మనీ తెలుగు