న్యూఢిల్లీ: మొదట్లో కస్టమర్లకు ఉచితంగా ఎస్‌ఎంఎస్ రూపంలో లావాదేవీల వివరాలను ఇచ్చిన స్టేట్ బ్యాంక్ ఆఫ్ ఇండియా (ఎస్‌బీఐ) ఇక మీదట కస్టమర్ల నుండి ఫీజు వసూలు చేయాలని నిర్ణయించుకుంది. ఇందులో భాగంగా ఎస్‌ఎంఎస్ వివరాలకు ఏడాదికి రూ. 60 చార్జీ ఉంటుందని ఒక ప్రకటనలో తెలిపింది. దీనితో పాటు మూడు నెలలకు రూ. 15 చొప్పున సేవా పన్నుని కూడా వసూలు చేయనుంది. ఈ ఫీజు వసూలు జూన్ క్వార్టర్ నుంచే అమల్లోకి వస్తుందని తెలిపింది.

ఇది ఇలా ఉంటే ఈ చార్జీలు ప్రత్యేక అలర్ట్‌లకు మాత్రమే వర్తిస్తాయా లేక నిబంధనల ప్రకారం ఇచ్చే డెబిట్/ క్రెడిట్ కార్డు లావాదేవీల ఎస్‌ఎంఎస్‌లు సైతం ఫీజు పరిధిలోకి వస్తాయా అనేది ఎస్‌బీఐ తన ప్రకటనలో స్పష్టంగా చెప్పలేదు. మొదటగా ఎస్‌బీఐ ఈ నిర్ణయం తీసుకోవడంతో ఆ తర్వాత మిగతా బ్యాంకులు దీనిని అనుసరించే అవకాశాలున్నాయని అంటున్నారు. గతేడాది చివరి త్రైమాసికంలో ఎస్‌బీఐకి ఫీజుల రూపంలో ఆదాయం 8.13% తగ్గి రూ.3,873 కోట్లుగా నమోదైంది. మొత్తం ఏడాదికి చూస్తే 5.02 శాతం తగ్గుదలతో రూ.11,484 కోట్లుగా ఉంది.

ప్రైవేటు రంగ బ్యాంకులైన ఐసీఐసీఐ, హెచ్‌డీఎఫ్‌సీ ఇప్పటికే ఎస్‌ఎంఎస్ అలర్ట్‌లకు రూ.60 చొప్పున సంవత్సర చార్జీని వసూలు చేస్తున్నాయి. సేవా పన్ను దీనికి అదనం. అయితే, నగదు విత్‌డ్రా, డిపాజిట్‌లకు సంబంధించిన ఎస్‌ఎంఎస్‌లకు కాకుండా ఇతర ప్రత్యేక ఎస్‌ఎంఎస్ అలర్ట్‌లకుగాను ఈ బ్యాంకులు చార్జీ విధిస్తున్నాయి. ప్రస్తుతం సేవా పన్ను 12 శాతంగా ఉంది. యాక్సిస్ బ్యాంక్ కూడా మూడు నెలలకు రూ.15 చొప్పున ఫీజు వసూలు చేస్తోంది. నిర్వహణ వ్యయాలు పెరుగుతుండటంతో బ్యాం కులు ఆ భారాన్ని ఖాతాదారులపై మోపుతున్నాయి. చాలా బ్యాంకులు ఇప్పటికే డెబిట్/ఏటీఎం కార్డుల వినియోగానికి సంబంధించి ఫీజులను ప్రవేశపెట్టాయి.

వన్ఇండియా మనీ తెలుగు