న్యూఢిల్లీ: ప్రభుత్వ, ప్రయివేట్ ఉద్యోగులందరికీ శుభవార్త. గతంలో ప్రావిడెంట్ ఫండ్ (పీఎఫ్) కోసం నెలలు తరబడి వేచి చూసే ధోరణికి ఇక మీదట స్వస్తి పలకనున్నారు. ఉద్యోగులు ఒక కంపెనీ నుండి మరో కంపెనీకి మారినప్పడుల్లా పీఎఫ్ ఖాతా బదిలీకి, ఉపసంహరణకు నానాపాట్లూ పడాల్సిన ఇబ్బంది ఇకపై ఉండబోదు. ఆన్‌లైన్ ద్వారా ప్రావిడెంట్ ఫండ్‌ను అవలీలగా బదిలీ చేసుకోవడం.. ఉపసంహరించుకోవడం లాంటి సదుపాయాన్ని ఉద్యోగుల ప్రావిడెంట్ ఫండ్ సంస్థ (ఈపీఎఫ్‌ఓ) జూలై తొలి వారంలో అంటే 3 లేదా 4 తేదీల్లో ఈ సదుపాయాన్ని ప్రారంభించనున్నట్లు సంస్థ సెంట్రల్ ప్రావిడెంట్ ఫండ్ కమిషనర్ కేకే జలాన్ తెలిపారు. ఈరోజు కేంద్ర కార్మిక మంత్రి శీష్‌రాం ఓలాను కలిసి దీనిపై చర్చించనున్నట్లు చెప్పారు.

ఆన్‌లైన్‌లో క్లెయిమ్‌ల పరిష్కారం కోసం సెంట్రల్ క్లియరెన్స్ హౌస్‌ను ఈపీఎఫ్‌ఓ ఏర్పాటు చేయనుందని సమాచారం. దీని వల్ల దేశంలోని సుమారు 5 కోట్ల మందికి లభ్ది కలగనుంది. ఆన్‌లైన్‌లో పీఎఫ్ క్లెయిమ్‌ల సదుపాయాన్ని జులై 1 నుండి అందుబాటులోకి తీసుకురానున్నట్లు గతంలో పేర్కొన్న విషయం తెలిసిందే. ఈ ఆన్‌లైన్ విధానంలో ఉద్యోగి పీఎఫ్ వివరాలను అతని పాత కంపెనీతో తనిఖీ చేసుకునే బాధ్యత కూడా ఈపీఎఫ్‌వోపైనే ఉంటుంది.

ప్రస్తుత ఆర్థిక సంవత్సరంలో 1.2 కోట్ల క్లెయిములు వస్తాయని ఈపీఎఫ్‌ఓ అంచనా. 2013 జూన్ 11 నాటికి ఏకంగా 5.39 లక్షల పీఎఫ్ క్లెయిములు పెండింగ్‌లో ఉన్నాయి. సాధ్యమైనంత వరకూ ఎక్కువ క్లెయిమ్‌లను మూడు రోజుల వ్యవధిలోనే పరిష్కరించేందుకు ఎటువంటి నిర్ణయాలు తీసుకోవాలనే అంశంపై జులై 5న అన్ని జోన్లకు సంబంధించిన అధికారులు సమావేశం కానున్నారు.

వన్ఇండియా మనీ తెలుగు