న్యూఢిల్లీ: రోమింగ్ నిబంధనల ఉల్లంఘనకు గాను భారతీ ఎయిర్‌టెల్‌కు రూ. 650 కోట్లకు జరిమానా విధిస్తూ కేంద్ర ప్రభుత్వం నిర్ణయం తీసుకుంది. ఎయిర్‌టెల్‌కు ఈ జరిమానా విధించే విషయంపై టెలికం మంత్రి కపిల్ సిబల్ మోదం తెలిపినట్లు ఆ శాఖ అధికారి తెలిపారు. 2003-2005 మధ్య సబ్‌స్క్రయిబర్ లోకల్ డయలింగ్(ఎస్‌ఎల్‌డీ) స్కీమ్‌లో నిబంధనలను కంపెనీ అతిక్రమించి... జాతీయ అంతర్జాతీయ కాల్స్‌ను లోకల్ కాల్స్ గా మార్చిందని ఆరోపణ. దీన్ని 2003 నిలిపివేయాల్సిందిగా కోరినా.. పట్టించుకోకుండా 2005 వరకు కొనసాగించిందని టెలికం మంత్రిత్వశాఖ పేర్కొంది.

ఇలా చేయడం వల్ల ప్రభుత్వరంగ బీఎస్‌ఎన్‌ఎల్‌కు, సర్కారు ఖజానాకు భారీగా నష్టం వాటిల్లిందని కమిటీ తేల్చిచెప్పింది. కాగా, జరిమానా చెల్లించాల్సిందిగా ఎయిర్‌టెల్‌కు ఈ వారంలోనే డిమాండ్ నోటీసును జారీ చేయనున్నట్లు ఆ అధికారి చెప్పారు. తాజా పరిణామాలపై భారతీ ఎయిర్‌టెల్ కంపెనీ ప్రతినిధి మాట్లాడుతూ... డాట్ నుంచి తమకు ఎలాంటి సమాచారం అందలేదని, దీనిపై స్పందించడానికి నిరాకరించింది.

గతంలో 2జీ స్పెక్ట్రం కేటాయింపుల కేసులో టెలికం దిగ్గజం భారతీ ఎయిర్ టెల్ ఛైర్మన్ సునీల్ మిట్టల్‌తో పాటు మరో ఏడుగురికి సీబీఐ కోర్టు సమన్లు జారీ చేసిన విషయం తెలిసిందే. ఎన్డీయే హయాంలో 2002లో భారతీ సెల్యులార్ (ప్రస్తుతం భారతీ ఎయిర్‌టెల్), స్టెర్లింగ్ సెల్యులార్ (వొడాఫోన్ మొబైల్ సర్వీస్)కు ఢిల్లీ మెట్రో ఏరియాలోను, హచిసన్ మ్యాక్స్‌కు ముంబైలో స్పెక్ట్రం కేటాయింపులు జరిగాయని వివరించింది. బీజేపీ దివంగత నేత ప్రమోద్ మహాజన్ అప్పట్లో టెలికం మంత్రిగా వ్యవహరించారు.

వన్ఇండియా మనీ తెలుగు