హైదరాబాద్: రాము అనే సాప్ట్‌వేర్ ఇంజనీర్ బస్సులో ప్రయాణిస్తుండగా అతని పర్సుని దొంగలు తస్కరించారు. తస్కరించిన పర్సులో ఉన్న క్రెడిట్ కార్డు ద్వారా దొంగలు వారికి కావాల్సిన ఫోన్స్, దుస్తులు మొదలగునవి కొనుగోలు చేశారు. ఈ కోనుగోలు అంతా పాయింట్ ఆఫ్ సేల్ మెషిన్‌ ద్వారా జరిగింది. రాము డెబిట్ కార్డులో ఎంతెంత డబ్బు దొంగలు వినియోగించారో ఆ మొత్తం సమాచారం రాముకి మేసెజ్ రావడంతో క్రెడిట్ కార్డు కస్టమర్ కేర్‌కి ఫోన్ చేసి క్రెడిట్ కార్డుని బ్లాక్ చేయమని చెప్పినప్పటికీ.. ఈలోపులో జరగాల్సిన నష్టం రాముకి జరిగిపోయింది. రాముకి ఎదురైన ఈ సంఘటన మనలో చాలా మందికి జరిగే ఉంటుంది. ఇలాంటి సంఘటనలను నివారించేందుకు ఆర్‌బీఐ నడుం కట్టింది. దీంతో ఎప్పుడైనా.. ఎక్కడైనా షాపింగ్ కాంప్లెక్స్‌ల్లో డెబిట్ కార్డుతో కొనుగోళ్లు జరిపే వారు ఇకపై పిన్ నెంబర్‌ను తప్పకుండా టైప్ చేయాల్సి ఉంటుంది.

ఈ నిబంధనను జులై 1 నుండి అమల్లోకి తీసుకురానున్నట్లు రిజర్వ్ బ్యాంక్ ఆఫ్ ఇండియా (ఆర్‌బీఐ) చర్యలు తీసుకుంటుంది. దీనికి కారణం డెబిట్ కార్డు పొగొట్టుకున్న యజమాని గుర్తించే సరికే.. షాపింగ్ కాంప్లెక్స్‌ల్లో సాధ్యమైనంత మేర కొనుగోళ్లు జరుపుతున్నారు. ప్రస్తుతం బ్యాంకులు జారీ చేస్తున్న అత్యధిక డెబిట్ కార్డుల్లో అత్యధికం మాగ్నటిక్ స్ట్రిప్ ఉన్నవే. షాపింగ్ కాంప్లెక్స్‌లు, పెట్రోల్ బంకులు ఎక్కడైనా పాయింట్ ఆఫ్ సేల్ మెషిన్‌లో ఈ కార్డుని స్వైప్ చేసినప్పుడు.. ఖాతాలో నగదు ఉంటే బిల్లుకు ఆమోదం లభిస్తుంది. ఈ కార్డు తీసుకువచ్చిన వ్యక్తి సంతకం పెడితే సరిపోతుంది. ఐతే నిజంగా అతను డెబిట్ కార్డు లేదా క్రెడిట్ కార్డు యజమాని అవునా కాదా అనే విషయం సదరు దుకాణదారులు గుర్తించ లేరు.

దీనిని అదునుగా తీసుకోని కార్డుని తస్కరించిన మోసగాళ్లు వేలకు వేలు కార్డుల నుండి లాగేస్తున్నారు. దీనిని గమనించిన ఆర్‌బీఐ ఇక మీదట పాయింట్ ఆఫ్ సేల్ మెషిన్‌ దగ్గర కార్డుని స్వైప్ చేసినప్పుడు, పిన్ నెంబర్ (ఎటీఎం సెంటర్‌లో మీరు డబ్బు డ్రా చేసుకునే సందర్బంలో ఉపయోగించే) కూడా తప్పనిసరిగా టైప్ చేయాలని ఆర్‌బీఐ ఆదేశించింది. భారతీయ స్టేట్ బ్యాంక్ ఆఫ్ ఇండియా (ఎస్‌బీఐ) ఈ విధానాన్ని పాటిస్తుంది. ఇదే విధానాన్ని త్వరలో అన్ని బ్యాంకులకు అమలు చేయాల్సి ఉంటుంది. ఇక మీదట మీ కార్డు దొంగిలించబడినప్పటికీ.. పిన్ నెంబర్ తెలియకపోతే కొనుగోళ్లు చేయడం అసాధ్యం.

వన్ఇండియా మనీ తెలుగు